İstiqlal mücahidi

Zülmün üzünə haqq deyilən

şilləni çəksən,

Şilləndə möhürlənmiş

o qeyrətdədir Allah.

B.Vahabzadə

Görkəmli alim, hürriyyət aşiqləri Hüseyn Cavid, Ömər Faiq Nemanzadə, Üzeyir Hacıbəylinin sevimli tələbəsi olmuş professor Əkrəm Cəfər hələ ilk gənclik illərindən başlayaraq Azərbaycan xalqının milli müstəqillik, azadlıq ideyaları uğrunda mübarizə səngərlərinə atılmışdır. 1942-ci ildə alim pantürkizm, panislamizm, antisovetizm damğaları ilə ittiham olunaraq, 12 il müddətinə azadlıqdan məhrum edilmişdir. Əkrəm Cəfər bütün şüurlu həyatı ərzində əbədi Turana, habelə Odlar Yurduna atəşin bir məhəbbətlə müstəsna xidmətlərdə bulunmuş, həqiqət önündə sənələrcə yaşayacaq fədakarlıq, milli-mənəvi dirəniş nümunələri sərgiləmişdir.

Ustad ahıl çağlarında belə - kommunizmin tüğyan etdiyi ötən yüzilin 70-80-ci illərində Vətənin azadlığı uğrunda özünün qələmi ilə vuruşmuşdur. Həmin dövrlərin məhsulları olan, məlum səbəblər üzündən nəşrlərdən kənarda qalan "Cəlladnamə", "Səadətnamə" adlı poemalar, onlarca hürriyyət ruhlu şeirlər, publisistik əsərlər qələmə almışdır.

Azərbaycan xalqının ən böyük faciələrindən olan 20 Yanvar faciəsi Əkrəm Cəfərin də məğrur sinəsinə dərin yaralar vurmuşdu. Ustadın şəxsi arxivini araşdırarkən məlum olur ki, o, 20 Yanvar qətliamı ilə bağlı hadisələrin öyrənilməsi və təbliğ edilməsi üçün xüsusi materiallar toplamışdı. Həmin tarixi-ədəbi sənədlərin sırasında müxtəlif mətbuat nümunələri, fotoillüstrasiyalar, habelə Əkrəm Cəfərin qələmə almış olduğu poeziya örnəkləri, siyasi məqalələri mövcuddur. Onlardan möhtərəm oxucuların nəzər-diqqətinə təqdim edirik.

Sokrat CƏfƏR

Dünyanın toy günü

yaxud

səadət həqiqəti

Duyuram,

anlayıram,

eşidirəm,

bəzən də görürəm hətta

Şəhərimizin küçələrində

O günün addım-addım gəldiyini.

Günəş kimi yavaş-yavaş,

Günəş kimi parıl-parıl

gözümüzdə yüksəldiyini.

Gəlir o gün,

gəlir o dövr,

o zaman,

O zaman ki, bütün qəlbindəkini

qorxmadan

yazmaq da,

danışmaq da olacaq mümkün.

Baxın necə görünür bu gündən o gün

Baxın

gözəl ağ göyərçinlərə

Onlar rəmzidir əbədi azadlığın,

əbədi sülhün.

Hər şey azad olacaq o gün:

Sevgi azad, dil azad, ürək azad,

Şair azad, şeir azad, dilək azad…

Bəşərin min illərlə nəsildən-nəslə söylədiyi,

Min illərlə həsrət içində gözlədiyi,

Uğrunda qanlar tökdüyü, candan keçdiyi

o böyük gün gəlir,

gələcək.

Və üstündə səadətin qızıl bayrağı

dalğalanan

Bu dünya axınının qabağını

saxlaya bilməyəcək

Nə Himalaylar, nə Ümmanlar,

nə Sakit Okean

Və nə onun sahillərində üz-üzə durub bir-birinə baxan

Yəcuclar,

Məcuclar…

Və, əlbəttə, o günə dünyada nə Yəcuc,

nə Məcuc qalacaq.

O gün azad dünyanın Toy günü olacaq.

fevral, 1990

Əkrəm CƏFƏR

Ədəbiyyat qəzeti.- 2011.- 20 yanvar.- S.2.