Səyyad Aran - 60

Hörmətli Səyyad müəllim!

Sizi - istedadlı yazıçımızı 60 yaşının tamam olması münasibətilə təbrik edirik.

Siz bədii yaradıcılığa ötən əsrin yetmişinci illərində başlamısınız. İlk mətbu hekayəniz - "Körpü" 1978-ci ildə "Ulduz" jurnalında dərc edilmiş, ilin üç ən yaxşı hekayələrindən biri kimi dəyərləndirilmişdir. Dövri mətbuatda vaxtaşırı əsərlərinizlə çıxış etmisiniz, 1983-cü ildə "Körpü" adlı hekayələr kitabınız oxucuların ixtiyarına verilmiş və maraqla qarşılanmışdır. Sonralar "Soyuq günəş", "Xaosdan sabitliyə", "Ufüqdə Nobel sülh mükafatı görünür" adlı kitablarınız çapdan çıxıb.

Siz 1972-ci ildə Bakı Dövlət Universitetinin filologiya fakültəsini bitirib müəllim kimi əmək fəaliyyətinə başlamısınız. Sonra hüquq fakültəsində ikinci ali təhsil almısınız. Ölkəmizin ictimai və siyasi həyatında fəal iştirak edirsiniz. İki çağırış Azərbaycan Respublikası Milli Məclisinin deputatı kimi səmərəli fəaliyyət göstəribsiniz. Azərbaycanın İstanbulda baş konsulu olmusunuz. Hazırda Milli Məclisdə çalışırsınız.

Ədəbi-ictimai fəaliyyətiniz "Tərəqqi" medalı, "Qızıl qələm" mükafatı, "İnam" şərəf diplomu ilə dəyərləndirilmişdir.

Hörmətli Səyyad müəllim!

Sizi bir daha yubileyiniz münasibətilə ürəkdən təbrik edir, sizə uzun ömür, cansağlığı, yeni-yeni yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.- 2012.- 9 noyabr.- S.5.