“Ona görə xoşbəxtəm ki...”
Noyabrın
19-da Azərbaycan Yazıçılar Birliyinin
Natəvan klubunda görkəmli ədəbiyyatşünas
alim, professor Qəzənfər
Paşayevin 75 illiyi
münasibətilə tədbir keçirildi.
Mərasimi
AYB-nin katibi Arif Əmrahoğlu açaraq
dedi: "Bu gözəl
günə hamımızın sevimlisi olan Qəzənfər müəllimin şərəfli
alim-vətəndaş ömrünün
işığını tutub gəlmişik.
Bu "işıq" sözünü
xüsusilə vurğulayıram. Ona
görə ki, Qəzənfər müəllim
həqiqətən də işıqlı, nurlu
şəxsiyyətdi - təmənnasız
xeyirxahlığı, diqqəti, alim cəfakeşliyilə
bir arada. Onun yaradıcılığı möhtəşəm
abidə kimidi. Eyni zamanda da maraqlı şəxsiyyəti.
Qəzənfər müəllimin ayağı dəyən, nəfəsi
ötən yerdə sevinc var,
rahatlıq var. O, təmənnasız
yaxşılıqları ilə həmişə insanların
yanındadı. Kərkükşünaslığımızın
başçısı kimi də, gözəl
dost, səmimi yoldaş,
ailə başçısı, tərcüməçi-araşdırmaçı
kimi də o, çox mükəmməldi. Qəlbinin
işığı çöhrəsini nurlandıran, ömrünü uzadan bir şəxsiyyət olan
Qəzənfər Paşayev
insanlığın dostu, elmin
cəfakeşidir".
Mərasimdə
çıxış edən xalq
yazıçısı, AYB-nin sədri Anar qeyd etdi
ki, İraqla Azərbaycanın
əlaqələri çox qədimdi.
Ölkəmizin bu qardaş
diyarda ilk mədəniyyət
və mənəviyyat təmsilçisi dahi
şairimiz Məhəmməd Füzuli olub. Bu gün Qəzənfər Paşayev
həmin missiyanı ləyaqətlə yerinə yetirir. O, türkman
qardaşlarımızı bir daha bizə tanıtdı, yenidən
doğmalıq köynəyindən keçirdi
- səmimiyyəti, qayğıkeşliyi və böyük təbiətilə…
Xalq
şairi, AYB-nin birinci katibi Fikrət Qoca
tədbirdə çıxış edərək dedi: "İnsanın ağlı, zəkası
ən böyük gücüdür
və Qəzənfər Paşayev bu gərəkli dəyərlərin, mənəvi
gücün
daşıyıcılarından, sahiblərindən biridir…"
AMEA-nın
müxbir üzvü,
türkoloq alim Tofiq Hacıyev yubilyarı qədirşünas
şəxsiyyət kimi səciyyələndirdi:
"Təkcə mərhum akademik
Həsən Şirəliyevin, professor Abbas Zamanovun xatirələrinə
bəslədiyi ehtiram hissi,
onların qəbirüstü abidələrinin
ucaldılmasına etdiyi yardım bəs
edər ki, Qəzənfər müəllimin
kamil insan
obrazını, qədirbilən simasını göz
önünə gətirək…"
Xalq şairi, millət vəkili Sabir
Rüstəmxanlı Q.Paşayevin dəyişməz,
sabit milli xarakterindən,
xeyirxahlıq duyğusundan ətraflı bəhs
edərək dedi: "Onun
maraq dairəsinin Nostradamusa
qədər genişlənməsi təsadüfi deyil və çəkinmədən deyirəm
ki, bu dahi
görücünün katrenlərini
şərh etməyin özü də bir görücülükdür,
Allah vergisidir.
Yaxın günlərdə nəşr etdirdiyi
"Ömrün əbədiləşən
illəri" kitabı isə Qəzənfər müəllimin
böyük insanlıq, millət və Vətən
sevgisinin bir
cavabıdır.
AMEA-nın
müxbir üzvü,
millət vəkili Nizami Cəfərov Q.Paşayevi özünün
də mənsub olduğu alimlər nəslinin
həmyaşıdı olan alimlərin böyük müəllimlərindən biri kimi səciyyələndirdi.
Vurğuladı ki, Qəzənfər
müəllimin özü əbədi bir sənət əsəri kimidir,
yaradıcılığının yiyəsi olan,
ona sahib çıxa
bilən bir alimdir.
Millət
vəkili Qənirə Paşayeva isə
yubilyarı tər-təmiz eşq, sədaqət
simvolu kimi
qiyaslandırdı: "Qəzənfər müəllim bizim nəslə gözəl əxlaqı ilə
nümunə olub, örnəyə çevrilib. O, gözəl ziyalı, gözəl
dost, gözəl ailə
başçısı və gözəl əmi
obrazıdı. Bütün məqamlarda
adının, milli kimliyinin
qarşısında bu epiteti
işlətmək olar".
Filologiya elmləri
doktoru Şirindil
Alışanlı yubilyardan ailələrinin
yaxın dostu kimi bəhs
etdi, mərhum şair
Hüseyn Kürdoğlunun
ona həsr etdiyi poemadan parçalar oxudu, unudulmaz
yaxşılıqları dilə gətirdi.
Millət
vəkili Jalə Əliyeva Q.Paşayevi
xeyirxahlıq simvolu kimi
səciyyələndirdi, yazıçı, millət vəkili
Aqil Abbas
vurğuladı ki, onun
yazdıqları tarix və millət üçündü, millətin
varlığını sabaha ləyaqətlə
daşıyır.
"Ədəbiyyat
qəzeti"nin baş redaktoru
Ayaz Vəfalı qeyd etdi ki, yubilyarla
onu uzun illərin səmimi
dostluq telləri bağlayır. Qəzənfər
müəllim bir dəfə salam verdiyi yerə qırx
il ehtiramla baş əyib keçən insanlardandı: “Qəzənfər müəllimin şəxsi
arxivində İraqda görüşüb
dostlaşdığı çox
ağsaqqalın, şairin, gənc
ziyalının, ümumən neçə-neçə sadə
xalq nümayəndəsinin qiymətli ədəbi-bədii
materiallarla zəngin söhbətləri
yazılmış lentlər, həmçinin
qalın-qalın dəftərlər, nəhayət, məktublar
vardır. Ancaq görünür, bunların
hamısından daha çox
ürəyinə, qəlbinə yazıb gətirmişdir.
İraqdakı azərbaycanlıların ləhcəsini diqqətli
təhlil nəticəsində "Kərkük dialektinin fonetikası" mövzusunda
namizədlik dissertasiyası yazıb müdafiə edib. Müəllif bu
sahədəki işinə görə kərküklü bir qocadan aldığı
ilk mükafatı da oxucusundan gizlətmir: "Get,
oğlum, yaradan sənə
yar olsun! Mənim dilim uğrunda
çalışırsan. Ölsəm də dil
uğrunda öləydim!.."
Şübhə
etmirsən ki, bu
sözləri həqiqətən
Mən dilimnən vaz keçməm, -
Olursam dilim-dilim! -
deyən bir xalqın
övladı, böyük
Füzulinin nəvə-nəticəsi
söyləyə bilər.
Bu tədbirdəki çıxışlar
da təsdiq edir ki, kərküklü
qocanın müqəddəs
duası qəbul olunub…”
Professorlar Vaqif Arzumanlı,
İmamverdi Həmidov,
filologiya elmləri doktoru Asif Rüstəmli,
kərküklü yazıçı
Əsəd Əbdül,
şairlərdən İlyas
Tapdıq və Beynəlxalq Rəsul Rza mükafatı laureatı, əməkdar müəllim Oqtay Rza söz alaraq
Q.Paşayevin çoxşaxəli
yaradıcılığından söz açdılar, ona həsr etdikləri
şeirləri oxudular.
Professor
Nizaməddin Şəmsizadə
çıxış edərək
vurğuladı ki, Qəzənfər müəllim
totalitar sovet sisteminin hər cür təpki və qadağalarına baxmayaraq, türk dünyasına çıxmağa
özündə güc
və cəsarət tapa bildi. Yetmiş beş illik
ömür boyu xalqa sevgi və
səmimiyyət yoluyla
getdi. Qarşıda isə onu daha möhtəşəm,
geniş yaradıcılıq
üfüqləri gözləyir.
Tənqidçi-ədəbiyyatşünas Qurban Bayramov
çıxış edərək
yubilyarın Kərküklə
Bakı arasındakı
birliyin möhkəmlənməsi
sahəsində gördüyü
işlərdən danışdı…
Sonda söz alan professor Qəzənfər
Paşayev yubiley mərasiminin keçirilməsinə
təşəbbüs göstərdiyinə
görə AYB-nin rəhbərliyinə dərin
təşəkkür etdi:
"Hər şey üçün, diqqətiniz
üçün çox
sağ olun. Mən xoşbəxt adamam - nəslimdən, xalqımdan,
dövlətimdən yarımışam.
Bütün həyatım boyu
ən böyük arzum Azərbaycanı azad, müstəqil görmək olub. Vaxtilə xaricdə işləyərkən
oraya müxtəlif ölkələrin dövlət
başçılarının gəldiyini görürdüm.
Bayraqları ucaldılır, himnləri
səslənirdi. Çox istəyirdim
ki, mənim müstəqil, azad ölkəmin bayrağının
bu cür ucaldığını görüm,
himnimiz belə səslənsin. Şükür ki, bu günü
görmək mənə
nəsib oldu. Müstəqilliyimizin, azadlığımızın şahidi oldum. Təbrizdən Bakıya yollar
açılıb, kərküklü
qardaşlarımız yubileyimdə
iştirak edir, tarixi dostluq, qardaşlıq körpüləri
bərpa olunur. Bütün bunlara görə özümü
xoşbəxt hesab edirəm, bundan sonra da xoşbəxt
hesab edəcəm…
Sərvaz
Ədəbiyyat qəzeti.- 2012.- 23
noyabr.- S.6.