Akademik Ziya Bünyadovun kitabı serb dilində

Ölkəmizin Serbiya Respublikasındakı səfirliyinin təşəbbüsü və dəstəyi ilə Belqradda Azərbaycanın tarixinə aid yeni kitab nəşr olunub.

Bu günlərdə Azərbaycan Respublikasının Qərbi Balkan ölkələrində – Serbiyada, Monteneqroda, Bosniya və Herseqovinada Fövqəladə və Səlahiyyətli səfiri Eldar Həsənovun təşəbbüsü və dəstəyi ilə Belqradda yeni nəşr – görkəmli tarixçi alim, akademik Ziya Bünyadovun «Azərbaycan VII-IX əsrlərdə» kitabı nəfis tərtibatla işıq üzü görüb. Belqradın «Total Trade İnternational» nəşriyyatında çar olunmuş əsəri tanınmış serb mütəxəssisi Draqolyub Masliçin redaktorluğu ilə Qradimir Poliç və Nina Poliç tərcümə edib.

Ümumiyyətlə, Azərbaycanla Qərbi Balkan ölkələri arasında münasibətlər ildən-ilə inkişaf edir. Serbiyada yalnız bir neçə ölkənin – Fransa, Rusiya, Almaniya, İspaniya, Böyük Britaniya, ABŞ kimi böyük dövlətlərin mədəniyyət mərkəzi var və artıq bir neçə ildir ki, Azərbaycanın adı da həmin sıraya daxildir. Təsadüfi deyil ki, bu gün Belqradın «Taşmaydan» parkında dünya miqyaslı siyasi xadim Heydər Əliyevlə görkəmli serb yazıçısı Milorad Paviçin abidələri yanaşı ucalır, Novi Sad şəhərində, Dunay çayının sahilində Üzeyir Hacıbəylinin xatirə kompleksi, görkəmli şair və dramaturq Hüseyn Cavidin Podqoritsada büstü var.

Azərbaycanın qədim tarixinin, zəngin mədəni irsinin, eləcə də görkəmli şəxsiyyətlərinin xaricdə tanıdılması və təbliği üçün Serbiya Resbublikasındakı səfirliyimiz öz mövcud imkanları çərçivəsində müntəzəm olaraq ciddi işlər görür. Qeyd edək ki, akademik Ziya Bünyadovun 1500 tirajla nəşr olunmuş son dərəcə qiymətli əsərinin Qərbi Balkanda nəşri səfirliyin bu sahədə ilk işi deyil. Təkcə son beş il ərzində Belqradda, Novi Sadda, Sarayevoda və Podqoritsada bir sıra kitablar - "Görkəmli adamların həyatı" silsiləsindən «Heydər Əliyev» və professor Zemfira Səfərovanın «Üzeyir Hacıbəyli» kitabları, Cəlil Məmmədquluzadənin «Seçilmiş əsərləri», Rəsul Rzanın «Rənglər» poeması, Elçinin «Ölüm hökmü», Çingiz Abdullayevin “Balkan opponentləri”, Kamal Abdullanın «Yarımçıq əlyazma» romanları, «Qarabağ həqiqəti», «Erməni soyqırımı: miflər və gerçəklər», «223-cü Qırmızı Bayraqlı Belqrad diviziyası» və s. kimi elmi, tarixi, bədii, sənədli nəşrlər serb və Çernoqoriya dillərinə tərcümə olunaraq adı çəkilən ölkələrdə geniş yayılıb.

Hesab edirik ki, əvvəlki nəşrlər kimi bu kitab da Azərbaycanla Qərbi Balkan ölkələri arasında mədəni münasibətlərin inkişafı işinə layiqli bir töhfədir.

Ədəbiyyat qəzeti.-2016.-4 iyun.-S.31.