Aydın Tağıyev-65

İstedadlı qələm adamı Aydın Tağıyevin 65 yaşı tamam olur. Mən hələ 80-ci illərdən, ilk hekayələri işıq üzü görəndən Aydın Tağıyevin ədəbi mühitin diqqətini çəkdiyini müşahidə etmişəm. O, bu illər ərzində müxtəlif ədəbi orqanlarda çıxan yazıları ilə oxucu sevgisini qazana bilib. Həmçinin, Aydın Tağıyev Şabran kimi qədim bölgələrimizdən birinin tarixi, etnoqrafiyası ilə maraqlanır və bu tədqiqatlarının nəticəsi kimi işıq üzü görən məqalələri diqqətəlayiqdir. Aydın Tağıyev Şabranda ədəbi mühitin aparıcı simalarından biridir. Son bir neçə ildə burda keçirilən tədbirlərin, yazıçılarla görüşlərin təşkilində yaxından iştirak edib. Bunları nəzərə alaraq Azərbaycan Yazıçılar Birliyi katibliyinin qərarı ilə Aydın Tağıyev AYB-nin Şabran bölməsinin rəhbəri təyin olunub. Bir neçə ay öncə Şabranda Xaqani Poeziya Günlərində, burdakı qaynar ədəbi mühiti, sözə, ədəbiyyata üstün münasibəti müşahidə etdim. AYB-nin Şabran bölməsinin fəaliyyəti ilə də yaxından tanış oldum. Mən Aydın Tağıyevi 65 illik yubileyi münasibəti ilə təbrik edirəm, ona bütün bu səmərəli işlərin davam etdirilməsi yolunda müvəffəqiyyət və yeni-yeni yaradıcılıq uğurları diləyirəm.

Azərbaycan Yazıçılar Birliyinin sədri, Xalq yazıçısı ANAR

Ədəbiyyat qəzeti.- 2017.- 26 avqust.- S.12.