Hekayələr
Aauuu...
Babasıyla
məktəbdən qayıdan Şəm-Şəm ikinci mərtəbəyə
qalxan kimi qaçıb durardı arxa həyətə baxan pəncərədə:
-Babacan,
baax, canavar olmuşam - və ulayardı. - Aauuu... aauuu...
-Gəl
gedək, qonşuları güldürmə bizə! - Baba
qolundan çəkərdi.
Bu yay kəndə
- nənəsinə qonaq gəlmişdi. Axşam olan kimi
babasının əlindən yapışdı:
-Getdik.
-Hara?
-Ulamağım
gəlir!
-Ulama, nənən
qorxar.
-Nənə?
-Caa-an!
-Qorxma,
ha.
-Maşallah,
oğlum yanımda, nəvəm yanımda, nədən
qorxacam, ay bala?!
-Bilirsən
da, mən canavar oluram hərdən?
-Nəəə...
canavar?
-Bax, indi
ulayacam!
-Ulayacaqsan?!
Vallah, itlər gəlib
şalvarını çıxardar, sakit otur.
-Qorxma,
babam yanımdadı. - Şəm-Şəm balkonun arxa həyətə
baxan tərəfinə keçdi:
-Aauuu...
aauuu... aauuu...
-Necədi,
nənə?
-Əsl
canavarsan ki, lap!
Şəm-Şəm
sevinə-sevinə qaçıb girdi yerinə - yorğanı
çəkdi başına.
Sabah
axşam da dünənki yerindəydi:
-Aauuu...
aauuu... aauuu.... aaa... - Birdən dayandı. - Ba-ba, o işıq nədi?
Baba diqqətlə
baxıb, birdən itləri çağırdı:
-Alabaş,
tut, Qarabaş, tut!
Bayaq itlər
hürə-hürə həyətin arxasına cumdu.
Qonşuların iti də onlara qoşuldu.
İşıqlar yoxa çıxmışdı.
-Baba, o nə
idi?
-Canavar.
Ayı və ovçular
Ayı dəmir
qəfəsin küncündə oturub, mürgü
döyürdü. Şəm-Şəm də babasıyla gəlib
qəfəsin qabağında dayandı.
-Babacan, səndən
gizli bir iş görmüşəm.
-Nə
iş? - Baba qaşlarını çatdı.
-Danlamazsan?
-Əlbəttə!
-"Hə", "yox"?
-Yox.
-Ayıya
bal gətirmişəm.
-Çaşmısan,
deyəsən, ayı, irağ olsun, qolunu dibindən qopardar.
-Qoparda
bilməz! - Şəm-Şəm əlini cibinə salıb,
dörd bükülü bir vərəq çıxartdı.
- Bax, babacan, balı buna bükmüşəm.
-Ay
qırışmal! - Baba güldü. -
Baxım?
-Ayıdan
sonra. - Şəm-Şəm vərəqi açıb, qəfəsə
yaxınlaşdı. - Ey, əyripəncə, gör sənə
nə gətirmişəm! - Ayı gözlərini
açıb, baxdı... baxdı, sonra da qalxıb irəli
yeridi. Şəm-Şəm geri çəkildi. - Olmaz, əyripəncə,
olmaz! Yaxına gəlmə, qorxuram!
Ayı
alnını qəfəsə dirəyib, birdən sağ pəncəsini
qabağa uzatdı.
-Əllə
danışma! Yaxşısı budur, dilini çıxart,
balı qoyum üstünə. Arısı da var ha, vursa, mənlik
deyil. - Şəm-Şəm kağıza çəkdiyi bal pətəyini
azca qabağa uzatdı.
Ayı
baxdı-baxdı... yavaşca
dönüb, gedib oturdu bayaqkı yerində.
-Qorxaq!
-Bəri
tut, görüm! - Baba şəklə baxdı. - Gözəl
çəkmisən! Bax, pətəyin bu tərəfində
ayı şəkli də çəksəydin, lap əla
olardı.
-Düz
deyirsən, babacan!
Ayı
üzünü yana çevirib, küsülü kimi
oturmuşdu.
Bu zaman
iki ovçu gəlib durdu qəfəsin qabağında:
-O deyil?
-Özüdür
ki, var.
-Bir az
arıqlayıb, deyəsən?
-Bir
var meşə - azadlıq, bir də
var - zoopark. Bura heyvanların həbsxanasıdır. Kökəlməyəcək
ki!
-Ey... əyripəncə,
gəlmişik, ha!
-Bax
gör bizi tanıyırsan?
Ayı başını səsə
çevirdi. Əvvəlcə küt-küt baxdı. Sonra
gözləri böyüyən kimi oldu. Bayaq dartınıb
yerindən qalxdı:
-Ö...ö...ö...
ööö... - var gücüylə donquldanıb, ovçulara tərəf
atıldı. Dəmir barmaqcıqlara dəyib, yanı üstə
aşdı.
-Gördüün,
tanıdı!
-Necə
tanımasın, neçə dəfə üz-üzə gəlmişik,
neçə dəfə gülləyə tutmuşuq, tələyə
salmışıq...
-Yuxu iynəsiylə
vurmasaydıq, indi o dünyalıq eləmişdi bizi.
-Ööööö....
- ayı sakit olmaq bilmirdi - donquldana-donquldana özünü qəfəsə
çırpır, başını dəmir şəbəkəyə
döyürdü.
-Görürsən
nə kinlidi, parçalamaq istəyir bizi?
-Ööööö...
- ayının səsi xırıldamağa
başlamışdı.
Bu zaman
zooparkın işçiləri gəlib ovçuları
götürüb apardı.
Ayı
sakitləşən kimi yerə çökdü -
yırğalandı-yırğalandı və yanı üstə
aşdı - tappadan başı dəydi beton döşəməyə
- xırıldadı. Bayaq ağzından qara qan
açıldı.
Çırpınıb-çırpınıb, arxası
üstə düşüb qaldı.
Şəm-Şəm
qorxmuş halda babasına baxdı. Baba qolundan çəkdi:
-Gəl
gedək!
-Ayıya
nə oldu, baba?
Şəm-Şəmlə
Nökərin əhvalatı
-Şəm-Şəm...
-Xorrr...
-Ay Şəm-Şəm!
-Hmmm...
-Səhər
açılıb, dur!
-Qoy
yatım!
-Dur!
-Durmuram!
Sən kimsən?!
-Mən sənin
nökərin!
-Rədd
ol... - Şəm-Şəm qışqırdı.
-Şəm-Şəm,
dur... dur...
-Qoy
ya-a-a-tım, nökər oğlu Nökər! -Şəm-Şəm
bağırıb ağzı üstə çevrildi.
Bayaq
Nökər sağ əlini havaya qaldırıb, cəld
aşağı endirdi -
şap... şap... şap...
-Adə,
-Şəm-Şəm dik atıldı, - yaramaz, neyləyirsən!?
- Yanını ovxalaya-ovxalaya çarpayıdan yerə
tullandı. -Rədd ol gözümün qabağından!
Bayaq
Nökər sağ əlini düyünləyib yeridi Şəm-Şəmin
üstünə.
-Aaa... -
Şəm-Şəm mat qaldı, - bu lap, deyəsən mənim
baş-gözümü əzmək istəyir?! - Güclə
özünü eşiyə atdı. Qapını dartıb,
çöldən bərk-bərk bağladı. Az
qalırdı qapı qırılsın - taq... taq...
***
Ad
günü münasibətilə Babası Şəm-Şəmə
xeyli pul vermişdi. O da gedib özünə Robot
almışdı. Adını da qoymuşdu "Nökər".
Bu Nökər həm ağıllıydı, həm də
üzüyola.
Hərdən
top-top oynayırdılar, hərdən gəzməyə
gedirdilər. Bəzən də Şəm-Şəm
görürdü bərk istidi, çağırıb Nökəri
yollayırdı marketə:
-Tut pulu,
get mənə dondurma al.
Nökər
gedirdi, bir dondurma əvəzinə ikisiylə
qayıdırdı.
Şəm-Şəmin
gözləri çıxırdı kəlləsinə:
-Adə,
nökər oğlu Nökər, olmaya oğurlamısan?!
Robot Azərbaycan
türkcəsini anlasa da, danışa bilmirdi. Odur ki,
"yox" əvəzinə başını yelləyirdi.
Şəm-Şəm tez qaçırdı marketə:
-Xala, mənim
Nökərim sizdən dondurma oğurlayıb, buyurun, gətirmişəm.
Satıcı
gülərdi:
-Birincisi,
Nökərin üstünə oğurluq yıxmayın, cənab.
İkincisi də nökər xoşuma gəldi, bir dondurma da
pay verdim.
***
Şəm-Şəm
yaxşı oğlan olsa da, yaman yuxucul idi. Oyatmasaydın,
axşamacan yatardı. Robotu da elə buna görə
almışdı:
-Məni
səhər saat 08.00-da durquzarsan. Durmasam, qalın ətimə
bir-iki şapalaq çəkərsən! Bərk yox, ha, diksinərəm,
yavaşca!
Robot da
kişi kimi sözünün üstündə durmuşdu -
Şəm-Şəm oyanmayanda bir-iki şapalaq çəkmişdi...
Amma neyləsin ki, əli dəmirdən idi -
ağrıtmışdı.
Elə həmin
günü Şəm-Şəm Babasıyla Robotu aparıb Təzə
Bazarda satdı. Bundan sonra bütün işləri
düşdü öz boynuna - gəzməyə tək
çıxırdı, oynamağa tək gedirdi, ürəyi
istəyəndə gedib dondurma alırdı. Hər dəfə
də satıcı qadın onu sorğu-suala tuturdu:
-Özün
niyə gəlirsən, nökəri yollasana?!
Şəm-Şəm
də mızıldayırdı.
Bir məsələ
vardı ki, daha Şəm-Şəm yatıb günortaya
qalmırdı. Axşam da televizora baxmadan yerinə girirdi ki, səhər
tez oyansın.
Qəşəm İsabəyli
Ədəbiyyat qəzeti.- 2017.- 30
dekabr.- S.11.