Cahan Gülsünün şeirləri
"Alma, alma"!
Çıx daha
gizləndiyin bucaqdan...
Mən uduuuzduuum,
uduuuuuzduuuuuuuum.
Qışqırıram, uzaqdan
səsim çatırmı sənə,
eşidirsənmi məni?!
Mənəm, mənəm,
Mənəm, mən!..
Qaldır başını bir az,
Bir az endir başını.
Bax, bu sənin
dənizin,
Bax, bu sənin
sahilin,
Bu da
balaca qızın...
Dəhşətlidir,
deyilmi?
əllərimdə
qan izi.
Bax,
yaxşı bax, yaxşı bax,
Sənə
tanış gəlirmi bu qan,
bu əl,
bu
"günah"?!
...yalvarıram,
çıx
daha,
oyunu
bitirmişəm.
Gəl,
su tök yu əlimi,
Özümü
öldürmüşəm...
"Mu"
"Mu" Sakit Okeanın
sularına qərq olub məhv olmuş qitədir. Deyilənə görə orada bir-birinin yarı olan
bütün kişi və qadınlar
bitişik olublar. Bir gün insanlar Tanrıya
qarşı günah edirlər. Tanrı
onları cəzalandıraraq bir-birindən ayırır, hər
birini dünyanın müxtəlif yerlərinə atır.
Qadınlara da uşaq dünyaya gətirmək cəzası
verir. Ona görə də indi kimsə əsl
yarını tapanda özünü tamamlanmış və həmin
insana mənasını bilmədiyi doğmalıq hiss edir. Çünki həmin insan onun tarixən bitişik
olduğu insandır.
Ehh,
balgözlüm...
Mu qitəsində
bitişik olduğumuzdan
əminəm.
Görən kimi tanıdım
sən osan,
o, sənsən...
Tanrı
bizi cəzalandıranda
sancılar içində
ilk dəfə sən
ayrılmışdın
canımdan...
Anam həmişə deyir ki,
qadın körpəsinin gözlərini
ilk dəfə görəndə
anlayır,
daha onsuz yaşaya bilməz...
Sənin
gözlərin isbatladı
haqlıymış anam...
Ürəyində
açdığın süfrədən
indicə doyub qalxmışam,
əllərinlə şum çəkmisən üzümə
dodaqlarımın kənarında,
gözlərimin altında
toxunuşların cücərəcək,
burnumda iki barmağının
izi bitəcək...
Əllərimlə dərəcəm...
əllərimlə
toxunuşlarını
bütün vücuduma
səpəcəm...
sonra da aramla oxuyacam:
"gün çıx,
gün çıx
kəhər atı
min çıx"...
və o gün...
o "Gün çıxanda",
səninlə Mu qitəsinə
dönəcəyik
yenə də...
***
Günəş
hələ bərq vurur gölün sularında,
Hələ gecə düşməyib,
başlamayıb Tanrının
qəbul saatı
Uzanıb
gedir gözlərimdə
fikir dalğaları:
- Görən Tanrı
hardadı?
Bir azdan bu göl
də,
Bu səma da,
Bu sevda da
qaranlığa qərq
olacaq...
Mən bilirəm,
köhnə fotoşəkillər
kimi unudulacaq insanlar
evlərin bir küncündə,
başlayıb bitəcək
həyat
solmuş albomların
içində...
Gülümsəyən üzlərdəki
donub qalmış
sevinc
və öldürmədikcə
ölməyən ümid
tək varı olacaq insanın...
sonra
qatar platformalarına
düzülmüş ümidlər
hərəsi bir vaqona minib gedəcək
uzaqlara...
Sönəcək şəhərin işıqları,
Gözlərini uzağa dikmiş
qadın baxışındakı
mənasızlıqdan
da betər olacaq
bu həyatı yaşamaq.
Hardasa balaca bir qızcığaz
sual verəcək anasına:
- "Allah baba hardadı?"
İllər sonra o qızcığaz
Sualının cavabını
Uzaq bir göl sahilində
tapacaq:
- "Mavi yollar, mavi
yollar...
...Məni Tanrıya aparacaq"
***
...Ehh
bilirəm, payız
gəlmir siz tərəfə.
Yarpaqlar
tökülmür, yağışlar
yağmır,
Tanrı
hamısını mənim
payıma yazmış...
İndi
baxıb məni xatırlamağa heç nə tapmırsan
"mən də
səni..."
Arabir əllərini qaldır havaya
küləyə toxundur,
toxundur küləyə.
O külək ki,
dağıtsın bir payız səhəri
saçlarımı,
qarışdırsın bir-birinə
bütün həyatım
kimi.
Bilirəm unudursan hər gün saçlarımı
"mən də
səni..."
Uzun-uzun
telləri
uzanacaq sərhədlərin...
bilirəm
sonra,
sonra
uzaq bir qadın bətnində
doğulacaq əllərin,
doğulacaq heç
vaxt olmamış
kimi...
Onun da ovcunda
əllərimin heç
vaxt dolmayan
boşluğu...
sən demə
qadının bətnində cücərirmiş
ayrılıqlar...
bilirəm, sevirsən
onu
"mən də
səni..."
***
Tanrım,
əllərimi açdım sənə.
ovcumdakı duaları
bir-bir çıxarıb
vurdun üzümə:
"Bəxtini bir daha sına"!
Nə edim,
nə edim ki,
ürəyim
uyuşmur başqasına?!
Onu,
onu
səsləyir
nə edim ki,
kəndirim
onun,
onun
əlləriylə asılmağı
gözləyir...
***
Bax,
günəş batır,
batır günaha...
gecənin günəşsizliyində
kimsə bir qadını aldadır...
O qadın ki,
sinəsində bəslədiyi
əzabla
dilindəki zəhərlə
yedizdirir övladını...
sən də bu şəhərin bir
küçəsində
nəfəs alıb-verirsən
ağaclar kimi,
quşlar kimi,
həşəratlar kimi...
Daha
xatırlamadığım heç
kəs,
heç vaxt doğulmamış kimsəsən...
Ədəbiyyat qəzeti.- 2017.-
15 iyul.- S.3.