Azərbaycanlılar

Siz ki hamıdan gözəl, hamıdan məğrursunuz,

Bədənlərə bürünən bir ilahi nursunuz.

Qəlblərə, ağıllara işıq sovurursunuz,

Azərbaycanlılar, azərbaycanlılar.

Dünya dönər, dəyişər, siz haqq ilə birsiniz,

Tarixin qatlarında açılmamış sirsiniz.

Yer üzünə səpilən bərəkət, xeyirsiniz -

Azərbaycanlılar, azərbaycanlılar.

Bu yurd, bu torpaq sizin, siz bu torpağınsınız,

Sonsuzluğa yürüyən müqəddəs axınsınız.

Siz elə yaranışdan Allaha yaxınsınız,

Azərbaycanlılar, azərbaycanlılar.

Tarix nələr görmədi, nə simalar, nə canlar,

Bəşərə güzgü oldu gəlib keçən zamanlar.

Adam kimi adamlar, insan oğlu insanlar -

Azərbaycanlılar, azərbaycanlılar.

Yondu, cilaladı ki, tarix bu ürəkləri

Siz daşıyasınız məhşərə gerçəkləri.

Göy üzü insanları, yer üzü mələkləri -

Azərbaycanlılar, azərbaycanlılar.

Yığılın, ey zərrələr, bir işığa yığılın,

Bir ürəyə boşalın, bir yumruğa sıxılın.

Bitməsin bu dünyanın Azərbaycan nağılı!

Azərbaycanlılar, azərbaycanlılar.

Azərbaycan dəyişir

Zaman axır, durulur, hər şey əslinə varır,

Varlığından süstlüyü, ətaləti qoparır,

Qəlbləri, beyinləri bir istək, bir hiss sarır,

Ruhunda bir çırpınış, bir həyəcan, dəyişir,

Azərbaycan dəyişir!

Cəsarəti, idrakı nəsillərdən irs alıb,

Səadəti əlində bir götürüb, bir salıb,

Yıxılıb, qalxıb, durub, dünənindən dərs alıb,

Addım-addım dəyişir, insan-insan dəyişir,

Azərbaycan dəyişir!

Elə bil hər tərəfə bir sehrli əl dəyir,

Bu yurdu, bu vətəni başdan-başa süsləyir.

Millətimin haqqıdır bolluq, bərəkət, xeyir,

İl-ildən rəvan gəlir, gün-güzəran dəyişir,

Azərbaycan dəyişir!

Xocalıda təkləyib düşmən bizi qıranda,

Tarixin bir küncünə sıxılıb hıçqıranda,

Bağırıb yerə-göyə "haqq hardadır" - soranda,

Elə o vaxt, o zaman bildik dövran dəyişir,

Azərbaycan dəyişir!

Qırılır, parçalanır modernizm bütləri,

Sıyrılır buxovundan bəşərin ümidləri.

Qurulur əllərində əsrin dinamitləri,

Üzdən, qabıqdan deyil, ruhdan, candan dəyişir,

Azərbaycan dəyişir!

Bu dövlət bu vətənin, bu xalqın varlığıdır,

O mənim göz-bəbəyim, düşmənə göz dağıdır.

İndi qeyrət dəmidir, indi hünər çağıdır -

Dərk edir bu tələbi qoca, cavan dəyişir,

Azərbaycan dəyişir!

Kim qıracaq bu əzmi, kim sarsacaq bu ruhu,

Bir ruh ki, sevdasından nə dönür, nə yorulur.

Gözlərimiz önündə yeni dünya qurulur,

Tarix soyulur, çıxır qabığından, dəyişir,

Azərbaycan dəyişir!

Məscidi, meyxanəsi, kilsəsi, sinaqoqu -

Hərəsində bir tarix, hərəsində bir toxu.

Hanı o peyğəmbərə ilk səda gəldi: "Oxu!"

Oxuduq, biz anladıq insan, zaman dəyişir,

Azərbaycan dəyişir!

Bakı - günəşdən qopan yurdumun almaz payı,

Əllərində xalqımın cilalanır, parlayır.

Bu nə şəfəqdir saçır, bu nə işıqdır yayır -

Gözdə nur, bədəndə ruh, cisimdə can dəyişir,

Azərbaycan dəyişir!

Bakı-əzmin, hünərin, vüqarın şah əsəri,

Sevginin, qardaşlığın, dostluğun baş şəhəri,

Səadətə can atan bir ruhun pöhrələri -

Dəyişdikcə siması varlıq, məkan dəyişir,

Azərbaycan dəyişir!

O daha tək deyildir meydanların içində,

Torpağına göz dikən şeytanların içində.

Bir inam, bir yüksəliş insanların içində,

Qoca tarix oyanır, bütün Turan dəyişir.

Azərbaycan dəyişir!

Sönməz, haqdan yanırsa, o işıq bir də sönməz,

Dönməz, qəlbdən gəlirsə, qəlb o sevdadan dönməz,

Bir kərə yüksəlirsə, o bayraq bir də enməz,

Nə o sevda dəyişir, nə o peyman dəyişir,

Azərbaycan dəyişir!

Dalğalan, bayrağım, dalğalan!

Dalğalan, bayrağım, dalğalan!

Sənə nə gözlər baxır.

Tarix zamanda deyil,

Sənin dalğalanmalarında axır.

Dalğalan, bayrağım,

Bu göylər sənindir,

Çəkinmə heç nədən, dalğalan!

Nə vaxtdır tarixin buxovlarında

Bu millət gücünü saxlar içində,

Dalğalan, baxıb da bayraqdarına

qürurla deyim:

Var millətimin bayrağı bayraqlar içində.

Dalğalan, bayrağım, dalğalan!

Üstünə Ay-ulduz əks edən,

Qoynunda ürəklər rəqs edən

ey sonsuz okean, dalğalan!

Parla, yan!

Köksündə şəhadət nurları parlayan,

cənnətdən bir parçam, dalğalan!

Ruhumun libası,

Bu dünyada geyinəcəyim

kəfənim - son parçam,

Dalğalan!

Arzu Əsədov

Ədəbiyyat qəzeti.- 2017.- 11 noyabr.- S.25.