Bədri Rəhmi EYUBOĞLU

 

SƏNİ DÜŞÜNDÜM…

 

Susadım,

Üç alma soydular,

üç də portağal,

Şirələrini çəkdim başıma,

Bir fincan suyun

                        yerini vermədi -

Yatmadı susuzluğum

 

Acdım,

Quş südü,

            bir də kişmiş gətirdilər,

Ye dedilər,

Gözümə təpdim,

Bir tikə kömbənin

                        yerini vermədi -

Keçmədi aclığım

 

Səni düşündüm, sevdiyim,

                                   şükredərək,

Su kimi əziz,

Çörək kimi mübarək olasan.

 

YARADANA MƏKTUB

 

Ulduzların cilvələndikləri yerdədirlər,

Buludların, əskik olmasınlar,

Eyni minval ilə

                səndən gəlib, sənə gedirlər…

Dənizlərin

     doldurduğun kasalarda çalxalanırlar -

bir damcı artmış,

                        bir damcı əksilmişlər.

 

Dağların ayaqlarımıza

                        çox, çox böyük gəldi,

Onları, bir dəfə olsun, geyən olmadı.

Daha dünən əlindən çıxmış kimi

                        hamısı yepyeni, təptəzədi,

Köhnələn bir şey varsa,

                        ömrümüzdü, ömrümüz.

Biz hər ölən ağacdan

              məscidlərimizə dirək düzəldirik,

Maraq üçün soruşuram:

Bəs sən, sən ölən insanlardan

                                   düzəldirsən?

 

 * * *

 

Sənə böyük səhərlərdən

            bəhs edəcəyəm, tosunum,

ən böyük məscidlər orda tikilir,

ən kiçik məzarlar orda qazılır,

ən qara yazılar orda yazılır…

 

Böyük şəhərlərə uyma, tosunum,

Elə bir yerdə yaşa ki,

            kiçik, amma sənin olsun.

Hər qarış torpağına

                     alnımın təri düşsün,

Hər ağacımın hər budağına

                                     əlin çatsın,

Küçələrində tanımadığın

                                      üz olmasın,

Ən uzaq məhəlləsində

    xəbərin olmadan kimsə ölməsin.

 

QARA SEVDA

 

… gözləməkdən gözlərimin

kökü saralmışdı,

            nəhayət ki, gəlib çıxdı -

bir dilimi zəhər, zəqqum,

bir dilimi candan şirin.

 

Nağıl kimi endi göy üzündən,

Üstələdi

            cümlə eşq hekayələrini.

 

Madam ki,

gəldi qara sevda,

Əlvida sevincə,

Əlvida uçan quşa,

Əlvida dosta, əlvida,

 

Çox şükür,

             çox şükür, gəlib çıxdı -

bilim,

Bir dilimi zəhər, zəqqum,

Bir dilimi candan şirin.

 

Hazırladı: Dilsuz

 

Ədəbiyyat qəzeti.- 2017.- 11 noyabr.- S.16-17.