Behçet AYSAN

 

GƏLƏCƏK DEYİLƏN

BİR ŞEY VAR

 

Bilirəm,

      gələcək deyilən

                       bir şey var,

dəmirin safı - su qatılmamışı.

Bilirəm,

      irmaqlar keçiləcək,

                  fırtınalar susacaq.

Bilirəm,

        gün gələcək -

                    üzümüz güləcək;

sülhə, qardaşlığa

salam verib,

           salam alacağıq,

çocuqlar

        hər axşam

                 tox yatacaq.

tikanlı məftillər olacaq,

tanklar-tüfənglər,

tuberkulyoz-filan,

işsizlik...

Eşq - göz-gözə,

        dostluq - çiyin-çiyinə,

bilirəm,

bizim ,

bizim

süd kimi ağappaq,

                  çörək kimi isti

günlərimiz gələcək,

qardaşlarım,

qanadlarında

     günəş bahar cilvələnən

quşların pişvazına çıxaq,

qollarımızdakı zəncirlərlə,

qəlbimizdəki yaralarla...

Bilirəm,

     gələcək deyilən

                    bir şey var,

dəmirin safı - su qatılmamışı.

Bilirəm,

      irmaqlar keçiləcək,

               fırtınalar susacaq,

Bilirəm,

       o gün gələcək,

              mütləq gələcək...

 

XOŞCA QAL

 

Xoşca qal,

     gəlişindən sevgi umduğum

                 böyürtkən rəngli gecə,

Xoşca qal,

        sərsərilər kimi

                      dolandığım küçə,

Xoşca qal,

özünə

      bambaşqa bir göy üzü nəqş edən

qardaşım - gecə fənəri!

Xoşca qal,

     qarlı havalarda

          çaldığım fit,

             oxuduğum türkü.

Xoşca qal,

     anamın bəyaz yaşmaqlı üzü,

Xoşca qal,

ihlamur ağacının gövdəsinə

                        yazdığım yazı.

Xoşca qal,

      uzaqlarda yanan

                 küləşin parıltısı...

Xoşca qal,

üz-gözümü isladan yağış,

gördüyüm yuxu -

eşq, qovğa kədər...

Xoşca qal,

       qırıq kətil,

           dəyirmi masa

               masanın üstündəki

                                 qum saatı.

Qum saatı,

        Sən demədinmi

                  getmək vaxtıdı?..

 

AY DÜŞƏR DƏNİZƏ

 

Ay düşər dənizə -

            səni xatırlayaram.

İncə-incə yağış yağar,

Limana yan alar gəmi -

            səni xatırlayaram.

 

Ay düşər dənizə -

qəlbim çırpınar, çırpınar

qəfəsə salınmış quş kimi,

önümdən

       bir qadın keçər,

                  qaralar geymiş,

yaxasında

            ipiri qırmızı bir gül -

                  səni xatırlayaram.

 

Ay düşər dənizə

mən

    hələ söylənməmiş bir türkü,

    hələ yağmamış bəyaz qar,

    hələ açmamış begonayam

Vağzalda

            tərpənmək üzrədir qatar -

                           səni xatırlayıram.

 

YOLAYRICI

 

Burda dəniz qurtarır,

qağayılar

    təlaş içində

        dalğaların qoynuna

                                   qayıdırlar,

mənimsə

gedəcək bir yerim yoxdu

Burda dəniz qurtarır

göy üzü başlayır,

ucsuz-bucaqsız,

dərin,

kirli göy üzü

Deyirəm,

      bacarırsınızsa,

                         durdurun,

pünhan yerdə sevişirlər:

rüzgarla rüzgar,

xəyalla xəyal,

yuxuyla yuxu.

 

Burda dəniz qurtarır

göyüzü başlayır;

qalmışam yolayrıcında -

qayıtmağa bir ada,

getməyə bir ulduz var

 

MOR SEVGİ

 

Ey mor sevgi,

nəyə, nəyə yetər gücün?

Məni

     o tənha

        dağ çeşməsinin

                      yanına apar,

sevdiyimin ovuclarını

      öpücüklərlə doldurum.

Ey mor sevgi,

nəyə, nəyə yetər gücün?

Gətirə bilərsənmi

        keçən günləri geri?

Yağdıra bilərsənmi

       sevdiyim yağışları?

Ey mor sevgi,

nəyə, nəyə yetər gücün?

Sağımda bir ulduz otursun,

               solumda bir ulduz,

bulud keçməsin aramızdan...

Ey mor sevgi,

nəyə, nəyə yetər gücün?

hər sevinc bir kədər,

hər eşq bir ayrılıq gətirir...

 

Hazırladı: Dilsuz

 

Ədəbiyyat qəzeti.- 2017.- 28 oktyabr.- S.16.