Vaqif Sultanlı Özbəkistanda beynəlxalq forumda iştirak edib

Dekabr ayının 10-11-də Daşkənd şəhərində “Özbəkistanın mədəni irsi dünya kolleksiyalarında” mövzusunda beynəlxalq forum keçirilmişdir. Özbəkistan Elmlər Akademiyası, İctimai Birliklərin müdafiəsi üzrə Parlament Komissiyası və Mədəni Dəyərlərin Tədqiqi Mərkəzinin YUNESKO ilə birgə əməkdaşlığı çərçivəsində keçirilən forumda dünyanın 40-yaxın ölkəsindən 350-dən artıq nümayəndə iştirak etmişdir. Belnəlxalq forumda Azərbaycanı Bakı Dövlət Universitetinin professoru, yazıçı-ədəbiyyatşünas Vaqif Sultanlı təmsil etmişdir.

Forumun əsas məqsədi Özbəkistanın müxtəlif dünya ölkələrinin əlyazmaları fondu, kitabxana, arxiv və muzeylərində qorunan ədəbi-mədəni irsinə diqqətin yönəldilməsidir. Tədbirin təşkilatçıları layihə əsasında sistemli şəkildə özbək ədəbiyyatı və mədəniyyətinin bir çox dəyərli incilərini aşkarlayaraq üzə çıxarmış, indiyədək iyirmi adda kitab nəşr etdirmişlər. Forumun keçirildiyi salonda nəşr olunan kitablar və hazırlanmış videoçarxlar nümayiş olunmuşdur.

Amerika, Almaniya, İngiltərə, Polşa, Çexiya, Rusiya, Hindistan, Yaponiya və başqa ölkə alimlərinin qatıldığı tədbirdə görülən işlərin yekunları müzakirə olunmuş və 2019-cu il üçün yol xəritəsi müəyyənləşdirilmişdir. Gələn il forumun daha geniş tərkibdə Daşkənd, Səmərqənd, Buxara və Xivədə keçirilməsi nəzərdə tutulmuşdur.

Vaqif Sultanlı həmçinin “Özbəkistanın mədəni irsi” təşkilatına üzv seçilmişdir.

Ədəbiyyat qəzeti.- 2018.-22 dekabr.- S.27.