Deyimlər...Duyumlar...

Bir bülbül ömrünü vursam da başa,

Bir bülbül nəğməsi oxumamışam!

***

"Eşq" sözündə səhv elədi makinaçı,

- Sən birinci deyilsən ki, - dedim - bacı!

***

Kəndimizə yollanardım quş qanadında,

Vardı çəkən həsrətimi ana adında.

Ana

Başını qaldırıb üzümə baxdı,

Gözümü gizlədim... ağlayacaqdı.

***

Gecələr yuxuda görürəm yarı,

Mənsiz də ötüşmür yar yuxuları.

***

Bu çöllərin yaraşığı - yam-yaşıl oba...

Bir də qoyun, bir də quzu, bir də xan çoban.

Ana gözləri

Üzüldü qaldı -

Bir cüt xəyaldı...

***

Qadın - əllərindən... qız - ürəyindən...

Qocalıq deyil ki, saçındakı dən!

***

Arı yuvası -

Xəyal dünyası...

***

- Çalış-çarpış, nə fayda, ömür qalır yarıda!..

- Kəpənək də fırlanır gül başına, arı da!..

Rəsul Rzanın xatirəsinə

Söz-söz, misra-misra yanıb töküldü,

Çay kimi kükrədi, gül kimi öldü.

***

Bacım Kifayətin xatirəsinə

O qəlbi saf, eşqi dərin bir gözəldi,

Gözəlliyi bədr olmamış, gözə gəldi.

***

İki sözlə bir lövhə çək -

Bənövşədə belədi ləçək.

***

Ürək olub bir gözəlin əsiri,

Nə dostu var, nə həmdəmi, nə sirri.

***

Çalışsam da görməyirəm xeyrin-barın,

Səməd Vurğun olmaq olmur, balalarım!

***

Qoymayır məni gözündən yana,

Yardımı bu qız, yoxsa ki, ana?!

***

Kəhərimin iz saldığı yollar uyuyur,

Hayandasa xatirəmi göz yaşı yuyur.

***

Misralarım qəlbimin oğlu-qızıdı,

Şeirlərim arzumun yaş kağızıdı.

***

Özündən müştəbeh adam görəndə,

Bir rəğbət oyanır özümə məndə!

***

Ağacın böhranı - çiçək, çiçəyin böhranı - bardı,

Eşqim qəlbimin böhranı, barını illər apardı.

***

Bir az ötkəm oldun, qeylü-qalın var,

Bir az yazıq oldun, sataşacaqlar.

***

Astaca sancdılar, yandı... bağırdı...

Dedilər: - Məlumdu, günahı vardır!

***

Bu balaca yanğılar xislətindi,

Bu yanğıyla şair olmaq çətindi.

Oğlum Anara

Yarı bələkdə -

Bir güldü ləkdə.

Professor

Rizvan Piriyevin xatirəsinə

Bir tikə çörəyi beş yerə bölər,

Bir tikə sevincə sevinə bilər.

***

Açılan səhər - bar-bəhərindi,

Tale - əllərin, bəxt - hünərindi.

Məhəbbət

O ağac deyil ki, qala barından,

Asıla qış boyu budaqlarından.

Ustadım Məmməd İsmayıla

Taleyi ömrünə qəmmi arıdıb,

Gülüşü elə bil göz yaşlarıdı!

***

Yaza bilməyəndə sığındım qəmə,

Yazdım... sığınmadım elə-aləmə!

***

- Yaman günlərin ömrü az...

- Ömürdən ki, uzun olmaz!

***

Sözünə qul olub dünyanı gəzdi,

Canına getsəydin, əsirgəməzdi.

Hicran

Bir ay da getdi -

"Ax-vay"da getdi.

Vüsal

Günlərin ömrü qardandı,

Arzularım bahardandı.

***

Budağa sığına bir bala sərçə,

Ötə... dinləyəsən sübh-səhərəcən.

***

Bir zəmi də bir dəndi,

Bir gün də ömürdəndi.

***

Zaman -

An...

***

Qar yağıb qaşa, bax!

Yaşa bax, başa bax!

***

Yol ver yoldaşa,

Yol tut, yollaşaq.

Müəllimim

Budaq Budaqova

Könlü-gözü arzuma, eşqimə açılan dan,

Yeridiyi yer belə inciməyibdir ondan.

İlk kitabını görməyən

Məşədi İsmayılın xatirəsinə

O arzuydu, o taledi ömrün qaynağı,

Kimsə şirin təsəlliydi, kimsə göz dağı.

***

Qucağa öyrətmə oğulu,

Qarışıqdır ömür yolu.

***

Dərələrdə sel daranır, təpələrdə al günəş,

Ömür - payız, payız -həzin,

həzinlik - xəyal günəş...

***

Bu yellər bir yel deyil, son baharın payıdır,

Bu günlər bir gün deyil,

qəmə dönüb qayıdır.

Qardaşım Tofiqin xatirəsinə

Sən məndən böyükdün boyda-buxunda,

Mən kiçik qardaşdım sənə baxanda.

Avtoportret

Oğlum oldu - təkrarım var,

ömrüm artdı dünyada;

Ölüm nədi, itim nədi -

düşməyəcək day yada!

Oğluma

Tale gün sınıb adına;

Ata sığınıb adına.

Qəşəm İsabəyli

Ədəbiyyat qəzeti.- 2018.- 6 oktyabr.- S.15.