Eşq

Ece Təməlqızının

ən çox sevdiyi sevgi şeiri

İndi sən qalxıb gedəcəksən.

Get.

Gözlərin qalacaqmı?

Onlar da gedəcəklər.

Getsinlər.

Halbuki

bilirsən

mən sənin gözlərinsiz

yaşaya bilmərəm...

Bir olan

Allah şahiddi ki,

yuxudan pis durmamışdıq -

xoşbəxt idik,

eşq daşırdı gözlərimizdən.

Bir quş

qonmuşdu barmaqlarıma,

uzun-uzun türkü söyləmişdi,

bir eşq gəlmişdi

və

bir daha getməmişdi,

qeyb olmuşdu

dünənki,

srağagünkü

yoxsulluğumuz,

sanki heç olmamış kimi...

İndi sən qalxıb gedəcəksən

Get.

Gözlərin qalacaqmı?

Onlar da gedəcəklər.

Getsinlər

Halbuki

bilirsən

mən sənin gözlərinsiz

yaşaya bilmərəm...

İndi

açsam pəncərəni,

gözləsəm,

sən gəlsən,

heç bir şey soruşmasam,

heç bir şey söyləməsəm,

sussam,

sussan,

sussaq.

Sükutun anlatdıqlarını

dinləsək,

arxa-arxaya otursaq,

hönkür-hönkür ağlasaq,

soruşmasaq bir-birimizdən

səbəbini,

sarılsam,

sarılsan,

sarılsaq.

Və

yenə heç nə danışmasaq,

amma anlasaq,

nə vardı yəni,

olsa,

nə olardı yəni,

xəyal-məyal,

xəyal-məyal...

Tərcümə etdi: Dilsuz

Camal SÜRƏYYA

Ədəbiyyat qəzeti.- 2018.- 20 oktyabr.- S.17.