Ən çətini...

Çox soyuqlar görmüşük

Üşümüşük qarlı, soyuq havalarda

Amma o vaxt bilməmişik

Bir qadının qollarında üşüməkdi ən çətini

ən çətini bir qadının qollarında üşüməkdi

Nə gizlədək, qorxmuşuq da,

Qorxumuzdan susmuşuq da, ağarıbdı rəngimiz də

dən düşübdü, çallaşıbdı saçımız da

Amma o vaxt bilməmişik

Bir qadının saçlarında

dənə dönüb ağarmaqdı ən çətini

Ən çətini bir qadının saçlarında dənə dönüb ağarmaqdı.

Gecələri öpüşlərə qərq edərək yatızdırıb

Səhərləri sığallarla oyatmışıq

Uzatmışıq özümüzçün o xoşbəxtlik anlarını

Amma o vaxt bilməmişik

Bir qadının mürgüləyən kədərini oyatmaqdı ən çətini

Ən çətini bir qadının mürgüləyən kədərini oyatmaqdı

Boğazından belinəcən rəqs eləyib dodağımız,

Toxunmuşuq, yoluxmuşuq tər qoxulu bədən adlı bir mərəzə

Amma o vaxt bilməmişik

Bir qadının gözlərindən ruhunacan toxunmaqdı ən çətini

ən çətini bir qadının gözlərindən ruhunacan toxunmaqdı.

Sərt olmağa çalışmışıq

Alışmışıq ağır-ağır yanındayam söyləməyə

Amma o vaxt bilməmişik

Bir qadının dizlərində uşaq kimi ağlamaqdı ən çətini

ən çətini bir qadının dizlərində ağlamaqdı uşaq kimi...

Amma o vaxt bilməmişik...

Heç indi də bilmirik ki...

Sonranı düşünmək

Bir gün biz olmayanda... yəni... sakitcə

əlimiz cibimizdə, çantamızda kitablar

hər gün keçdiyimiz küçələrdən keçərcəsinə

bu həyatdan köçəndə

nəsə qalacaqmı bizdən...

Hər gün dayanacaqda rastlaşdığım,

qısa saçlı qızdan sonra boşmu qalacaq onun yeri?

Yoxsa başqa qızlar dolduracaq həmin qəhvəyi boşluğu?

Qısamı olacaq saçları, buruqmu

Bir payız səhəri necə olacaq hava

Yenə küləklimi, yenə soyuqmu?

Darıxacaqmı yollar bizimçün?

Avtobusun şeh tutmuş pəncərəsi darıxacaqmı

Ona söykədiyimiz alnımızçün, üzümüzçün?

Unudacaqmı əllərimizi oxuduğumuz kitablar?

Bir gün, biz olmayanda...

Qatarların yadına düşəcəyikmi cəmi bir stansiyalıq?!

Oturduğumuz kafelərin

yadında qalacaqmı elədiyimiz söhbətlər

Heç olmasa Millerin pyesləri, Səmədoğlu şeirləri...

"O qızı unutdum" yalanları, "romanımı bitirdim" cümləsi...

Bir gün mən olmayanda...

Eşidiləcəkmi kədərli bir qız səsi:

"ortabab yazıçıydı, yaxşı sevgili də ola bilərdi, amma

Vaxtı çatmadı...".

***

Bir-iki dost qalıb hələ künc-bucaqda

Bir-iki roman mövzusu var hələ -

vərəqləri saralmış bloknotda

Bir-iki xatirə də gizlənib,

bir-iki siqaret qalmış qutuda.

"Bir-iki"lərdə ilişib yerində sayır -

Köhnə kitab qoxulu qəhvəyi həyat...

Yorğun etiraf

Çiynimə qoy başını uyu, uyu, sarışın.

Getmə burdan oralar quyu, quyu, sarışın.

Çiynimə qoy başını ağla, ağla, sarışın.

Yuxulu gözlərini bağla, bağla, sarışın.

Parıldayır ümidlər sönür, sönür, sarışın.

Yağır yağış, buludlar ölür, ölür, sarışın.

Dərd adamı içindən yeyir, yeyir, sarışın.

Tükənirik günbəgün şeir-şeir, sarışın.

Qutudakı siqaret bitir, bitir, sarışın.

Unudulmur gedənlər itir, itir, sarışın.

Tökülmüşəm içimə xəzəl-xəzəl, sarışın.

Məni gəl nizama sal qəzəl-qəzəl, sarışın.

Çiynimə qoy başını uyu, uyu, sarışın.

Getmə burdan oralar quyu, quyu, sarışın.

Pərviz SEYİDLİ

Ədəbiyyat qəzeti.- 2018.- 27 oktyabr.- S.11.