Bu yaxınlarda İranın paytaxtında keçirilmiş Beynəlxalq karate yarışında Bakı məktəblisi, 5-ci sinif şagirdi Zəhra Salmanlı tələb etdi ki, Dövlət bayrağımız ermənilərin bayrağından aşağıda görünməsin, yoxsa o, yarışlarda iştirak etməyəcək. Zəhranın istəyi yerinə yetirildi. Yarışlarda isə o, hətta erməni rəqibinə də qalib gələrək birinci yerə çıxdı.

Yeniyetmə balamız Zəhra Salmanlının bu ayıq-sayıqlığı, cəsarəti və qeyrəti hər birimizi dərindən təsirləndirdi, hədsiz qürurlandırdı. Birinci vitse-prezident, çox hörmətli Mehriban xanım Əliyeva xalqımızın bu sevincinə qoşularaq azyaşlı idmançı qızımızı səmimi təbrik etdi və ona hədiyyə olaraq kompüter bağışladı.

Zəhra Salmanlının qazandığı böyük nailiyyət hamı kimi məni də heyran qoydu, vəcdə gətirdi. Düşündüm ki, hamımız hər yerdə Zəhra balamız kimi yurd sevgimizi hər şeydən üstün tutmalıyıq.

Kağız-qələm götürüb aşağıdakı misraları sıraya düzdüm. Qoy bu şeir xalqımızın adından qeyrətli qızımıza 8 Mart töhfəsi olsun.

Qələbən mübarək, Salmanlı Zəhra!

Şad xəbər dolaşır Azərbaycanı,

Qələbən mübarək,

Salmanlı Zəhra!

Kaş bu sətirlərim gəzsin cahanı,

Uşaqlıq çağından

ad-sanlı Zəhra!

Bakının beşinci sinif şagirdi,

Döyüş meydanına

inamla girdin.

Tomris torpağının güneyindəki

Bütövlük bağının

gülünü dərdin!

Dünyanın karate yarışlarında

Şərəflə ucaltdın bayrağımızı.

Vətənin təbriki, alqışları da

Tehranda yandırdı çırağımızı!

Zirvədən-zirvəyə

çatmaq üçün sən

Yorulmaq bilmədən,

durmadan çalış!

Vətənə qeyrətli övlad bəxş edən

Yurdsevər ataya, anaya alqış!

Öyrənib dəyanət, səbr dərsini,

Sıranın öncülü olmağın əla!

Mehriban xanımın hədiyyəsini

Halal qismətin tək almağın əla!

Düşübsən güc, hünər

salnaməsinə,

Taleyi daha xoş zamanlı Zəhra!

Sevinib deyirik, deyərik yenə:

Qələbən mübarək,

Salmanlı Zəhra!

Oqtay RZA,

Əməkdar müəllim, şair,

Rəsul Rza mükafatçısı

Ədəbiyyat qəzeti.- 2019.- 8 mart.- S.23.