Ölməzliyə gedən yolçu

Məhəmməd Hadinin 140 illiyinə

Qalanlar - iz olduğunu...

Olanlar - söz olduğunu...

Haqqın - haqsız olduğunu

Bildi, getdi bu dünyadan.

Gördü dünya uzun yoldu,

Çox yüyürdü, tez yoruldu.

Rəngi soldu, gözü doldu,

Güldü, getdi bu dünyadan.

Millət idi dərdi-səri...

Qaçış idi hər səfəri.

Qaldı ölməz əsərləri

Öldü, getdi bu dünyadan.

Nə sağçıydı, nə də solçu.

Bir məzarsız qərib yolçu

Ölməzliyə gedən Elçi

Oldu, getdi bu dünyadan.

Od Oğlu, od Övladıydı,

Ustalar ustadı idi.

Şair Məhəmməd Hadiydi.

Gəldi, getdi bu dünyadan.

27.11.2019

Fikrət Qoca

Ədəbiyyat qəzeti.- 2019.- 30 noyabr. S. 4.