Uşaq şeiri

Yer tutmaq üçün

Müsabiqədə,

Uşaq şeiri

Yazırdı dədə.

Keçidən yazdı,

Cücədən yazdı.

Gündüzdən yazdı,

Gecədən yazdı.

Nədən başladı,

Neçədən yazdı?

Xoruza baxdı,

Beçədən yazdı.

Dedi, uşaqlar

Küsəcək məndən.

Münsif qiymətin

Kəsəcək məndən.

Yazdıqlarını,

Cırdı, tulladı.

Müsabiqəyə

Bunu yolladı:

Bütün gözəllik,

Şeir sözüdür.

"Ən yaxşı şeir,

Uşaq özüdür".

Ata rəsmi

Ağ vərəqlərə

Yaşıl qələmlə

"Səməni" rəsmi

Əkmişdi Aytac.

Ağ vərəqlərə

Mavi qələmlə

"Bulud" rəsmini

Bükmüşdü Aytac.

Ağ vərəqlərə

Boz qələmiylə

"Yağış" rəsmini

Tökmüşdü Aytac.

Ağ vərəqlərə

Qara qələmlə

"Ata" rəsmini

Çəkmişdi Aytac.

Amma çəkmədi

Atanın əlin.

Dedi, hirslənsə,

Döyməsin məni.

Top oyunu

Bilal dedi Mərdana, -

Top-top oynayaq, Mərdan?

Mərdan dedi Toplana, -

Top-top oynayaq, Toplan?

Toplan dedi Məstana,-

Top-top oynayaq, Məstan?

Məstan dedi Siçana, -

Top-top oynayaq, Siçan?

Siçan dedi Qaçana, -

Top-top oynayaq, Qaçan?

Qaçan dedi Uçana, -

Top-top oynayaq, Uçan?

Uçan getdi göylərə,

Uçdu, ucaldı, gəldi.

Top-top oynamaq üçün,

Günəşi aldı, gəldi.

Uşaq və sual

Yağışlar necə yağır?

Qar necə olur, ata?

Kürkü yırtıq kirpilər,

Kar necə olur, ata?

Ata, şimşək nədir ki?

Göy qurşağın kim çəkir?

Xortdanı kim qorxudur?

Ay işığın kim çəkir?

Günəşi kim saxlayıb?

Torpaq nədən yaranıb?

Ağac necə böyüyür?

Yarpaq nədən yaranıb?..

Sual-sual böyüdü,

Adam oldu balaca.

Uşaqla qaldı daha

Yanıltımac, tapmaca.

Faiq HÜSEYNBƏYLİ

Ədəbiyyat qəzeti.- 2020.- 5 iyun. S. 32.