Mənə zəfər yaraşır!

 

Şanlı Azərbaycan əsgərinin dilindən

 

Gözləyirəm illərdi,

İndi çox səbirsizəm.

Bu gün qisas günüdü

Mübarizəm, Təbrizəm

 

Vətənimdə toy tutub

Yallı gedən sənmisən?

Bu gün zəfər mənimdi,

Qarşımda əyilmisən!

 

Xocalıda körpəmin

Nədən oydun gözünü?..

Otuz ildi qəlbimdə

Daşıyıram bu zülmü..

 

Sənə ölüm yaraşır

Bu haqsız savaşında

Mənə zəfər yaraşır

Alnıaçıq, üzüağ,

Üçrəngli bayrağımla

Doğma Qarabağımda!!!

 

Əsgər, sənə salam olsun!

 

Qarabağ şikəstəsiüstündə yazılıb

 

Əsgər, sənə salam olsun,

Xoş gəlmisən, Qarabağa!

Bu yurd sənin vətənindi,

Qalx bu dağa, qalx o dağa.

 

Qartal kimi zirvəyə çıx

Göydə bayrağım sevinsin.

Torpağımı azad eylə,

Elim-oymağım sevinsin...

 

Qardaşımın canındadı

Hələ düşmən qəlpəsi.

Otuz ildi ürək yaxır

Anaların ah-naləsi.

 

Atamı düşmən gülləsi,

Anamı həsrət apardı.

Məni Xocalı ağrısı

Dünyadan çəkib qopardı.

 

Otuz ildi, dərd dağıyam,

Əsir yurdam - qolubağlı.

Adına "qaçqın" deyəndə

Utanıb hər qarabağlı...

 

Allahın ədalətiylə

Düşmənin çırağı söndü.

Mən daha qaçqın deyiləm

Düşmənlərim qaçır indi.

 

Ay yurdumun şan-şöhrəti,

Qazi əsgər, qalib əsgər...

Zalımları qov sonadək,

Var ol, yaşa, igid əsgər!

 

Mina RƏŞİD

 

Ədəbiyyat qəzeti.- 2020.- 17 oktyabr.- S.28.