Nostalji

Utancaq bir gecədir -

budaqlar arasında

ulduzların salxımı,

isti külək gətirir

xatirələr axımı.

Alma, armudun ətri

xatırladır atamın

bağındakı payızı,

pəncərəmdən görünür

gülümsəyən Ay üzü.

Diqqətlə dinləyirəm

gecənin nəfəsini,

yarpaq fitə döndərir

küləklərin səsini.

Atılsam da gecənin

yuxulu qucağına

sanki marafondayam

qaçıram sübhçağına.

Marjeta Rrapaj (Albaniya)

Poetik tərcümənin müəllifi: Adil Cəmil

Ədəbiyyat qəzeti.- 2020.- 18 yanvar. S. 26.