Şəhid Məsimov Əkbərə

Son səsini dinlədim.

Demisən: "Mənə görə

Heç narahat olmayın.

Vətən dardadır, ana.

Dönməsəm, bağışlayın".

Bağışlamaq nə demək?

Medal verdilər sənə.

Dönüb vətən olmusan.

İtkin dedilər sənə.

Dönüb Murov olmuşdun,

Vətəndə itmək nədir?

Sən əbədi vətənsən.

Torpağa dönmək nədir?

Nədir vətənə dönmək?

Göstərdin hamımıza.

Həm döndün, həm dönmədin

Sən bizim yanımıza.

Bədənin vətən oldu,

Ruhun səmalardadır.

Son sözün tarix olub,

"Ana, vətən dardadır".

Vətənin dar günündə

Sənin kimi oğullar

Savaşlara getdilər,

Canlarını verdilər.

Amma azad etdilər

Otuz ildir gözləyən

Başı uca dağları,

Müqəddəs torpaqları.

Sağ ol, müqəddəs şəhid.

Sağ ol, igid, qəhrəman.

Sənin kimi igidi

Unutmarıq heç zaman.

Şəhid Şirinov Eldara

Biz bilirik döyüşdə

Necə igid olmusan.

Tabor komandirinlə

Birgə şəhid olmusan.

Neçə silahdaşının

Köməyinə yetmisən.

Neçə-neçə düşməni

Yerində məhv etmisən.

Etmisən Füzulini

İşğaldan azad, şəhid.

Vermisən otuz illik

Həsrət ilə gözləyən

Torpağa həyat, şəhid.

Sənin kimi oğullar

Düşmənlərin başına

Odlu mərmi ələdi.

Qələbə müjdəsiylə

Dünyanı silkələdi.

Bu millətin and yeri

Ocağısız, pirisiz.

Savaş qəhrəmanları,

Zəfər elçilərisiz.

Nə qədər ki, bu vətən,

Azərbaycan xalqı var.

Sizin kimi oğullar

Ürəklərdə yaşayar.

Şəhid Tağıyev Ramidə

Hamının taleyində

Uğurlu yol şansı var.

Sənin tale yolunda

O yolların hamısı var.

Hamı yaxşılıq edir,

Neçə yola can atır,

Hamımızın məqsədi

Cənnəti qazanmaqdır.

Bu yolların hamısın

Bir anlığa keçmisən.

Sən öz şəhidliyinlə

Öz yolunu seçmisən.

Sənin yolun vətənçün

Canı qurban etməkdə

Birnəfəslik yoludur.

Qəhrəmanlıq yoludur,

Müqəddəslik yoludur.

Yolun mübarək, şəhid.

Bu milləti şad etdin.

Hamımızın yerinə

Vətəni azad etdin.

İndi bizim borcumuz

Adınızı yaşatmaq.

Qəlbimizdə gəzdirmək,

Başımız üstə tutmaq.

Şəhid Həsrətov Elməddinə

Vətən vətəndə itməz.

Şəhidlər vətəndilər.

Vətənin can ağrısın

Canında çəkəndilər.

Hamımız can deyirik

Vətən azadlığına,

Şəhidlərsə qan tökür

Vətənin sağlığına.

Sən də şirin canını

Vətənə fəda etdin,

Bütün arzularına

Əbədi vida etdin.

Bəlkə ən böyük arzun

Şəhidlik olub sənin,

Dönməzlik, qəhrəmanlıq,

İgidlik olub sənin.

Necə olub, bilmirəm,

And içirəm torpağa.

Bircə onu bilirəm.

Sən müqəddəs bayrağı

Sancmısan Qarabağa.

Şəhid Zeynalov Fikrətə

Xüsusi təyinatlı,

Dəmir adam, daş adam.

Zəfər tariximizdə

Əbədi yaddaş adam.

İndi bizi görürsən,

Biz də səni duyuruq.

Vətən adı gələndə

Səni xatırlayırıq.

Xatırlayırıq indi

Necə igid olmusan.

Doxsan üç düşmən vurub,

Qisasını almısan.

Almısan torpağına

Göz dikənin canını.

Tarixi yurdumuzu,

Vətən gülüstanını.

Sən elə bir igidsən,

Mərdliklə yoğrulmusan.

Bir dəfə şəhid olub,

Min dəfə doğulmusan.

Günəş kimi nur saçıb,

Yayılırsan hər yana,

İgidliyin bəllidir

Bütün Azərbaycana.

Şəhid Yusifli Azərə

Adın Azər, özün Baycan.

Bir canda, bir bədəndəsən.

Can bədəndən ayrı olmur,

Bayraq da sən, vətən də sən.

Ruhun gəzir səmalarda,

Onsuz yerin baş üstündə.

O getdiyin döyüş yolun

Tarix yazıb daş üstündə.

"İstiqamət Zəngilandır"

Sən dediyin sonuncu söz.

Həm zəfərin son xəbəri.

Həm sonuncu alovlu köz.

Könüllərdə əbədisən,

Yaddaşlarda daş gizirim.

Xocalının qisasını

Alan şəhid baş gizirim.

Elşad Barat

Ədəbiyyat qəzeti.- 2021.- 28 avqust. S. 27.