Sözgəlişi...

Hisslər ata oxşayır - yüyəni əlindədirsə - üstündəsən, əlindən buraxdınsa - altındasan...

***

Ürəyin kardioqramması həyatın şifrəsinə bənzəyir. Qalxıb-enmələr - həyat, düz xətt - ölüm...

***

Öz içində intihar edənlərin - üzünün geyimi təbəssümdən olar...

***

Günah edərkən vicdan qaçqındır...

***

Dost - evin kimidir. Sən onun içindəsən...

***

Yarpağa həsəd apardım... ağacın budağından yerə düşüb qurusa da, ayaq altında xışıltısıyla ruhu oxşaya bilir...

***

Röya - gözübağlı yaşanan azadlığın üzüdür...

***

Sarsılan insan yaralı quşdan məkansızdır. Quş yerə çırpılar, insan içinə...

***

Körpə səsi gələn evin ürəyi ritmdən çıxmaz...

***

Güzgü əsl dostdur - həqiqəti gözünə çırpır...

***

Gözlərimiz içimizlə çölümüz arasında pəncərədir - hər iki tərəf görünür...

***

Öz içinin burulğanından çıxanlar ölümə satılmayanlardır...

***

Üzümüzdən çox səsimiz özümüzə oxşayır...

***

Gözümüzün çəkdiyi yoldan gedənlər, ürəyimizə gələnlərdir...

***

Gözü doymayanın, ruhu acından ölər...

***

Fiziki yox, mənəvi doğduqlarımız doğmalarımızdır...

***

Sevəndə gözü müalicə etmək gərək... Çünki göz tutula bilir...

***

Doğulanda - səsi çıxmayan körpəyə, yaşayanda - səsi çıxan insana, öləndə - səsi çıxarılan adama şillə dəyir...

***

Həyatın maskası çoxdur - hər gün bir üzünü cırıb atırıq...

***

Hər şey saniyənin əlindədir - dəqiqəni əlində oynadıb, saatın üstünə ata bilir...

***

Dostun da, düşmənin də yeri arxadır - dayaq da, zərbə də arxadan gəlir...

***

O hərfinin gücü çoxdur - həm yüksəldir, həm alçaldır, həm mükafatdır, həm də təhqir...

***

Sünilik yamaq kimidir - tikişləri görünür...

***

Yoxluğun üzündə görünməkdənsə, varlığın dibində qalmaq məsləhətdir...

***

Kölgəmiz də etibarsızdır - yalnız ayaq üstə olanda başımıza dolanır...

***

Vücudumuzun müvəqqəti kirayənişinləriyik - ona baxmasaq bizi qovacaq...

***

İntuisiyamızın siqnalları ömrümüzün xəritəsini çəkir - eşidə bilsək...

***

Azadlığın ən iyrənc formasını sərxoş adam yaşayır...

***

Azadlıq - hissin, fikrin çatışmayan havasıdır...

***

Ruhu yumaq üçün vasitə icad olunmayıb - çalış ləkələmə...

***

Beyinin hansı otağında olursansa ol, işıqları söndürmə...

***

Əxlaqı itkin düşənin axtarışı səmərəsizdir...

***

Düşəndə də əldən düşəsən, gözdən yox...

***

Yazılmayan qanunlar yazılanlardan güclüdür - yazılmayanı pozmaq olmur...

***

İnsan, özünə yad qatda, ütü ilə açılmayan qırış kimidir...

***

Ağıl da bıçaq kimidir - itilənməsə kəsmir...

***

Əlimiz çatmayanlara doğru qaçarkən, əlimizdə olanları da itiririk...

***

Həyatımızın havasına oynaya-oynaya rəqqasa çevrilirik...

***

Kimlərsə düyün bağlayır, kimlərsə düyün açır... Kimlərsə açılıb-bağlanan düyünün arasındadır...

***

Üzümüzün suyunu da içənlər var...

***

Pərdəni gözdən asanda, aralığın pərdəsi olmaz...

***

Hamıya bir gözlə baxmaq olmaz - Allah iki göz verib, o birisi bekar qalır...

***

Fikirlərin arasına çürük söz qatanda zəhərlənmə verir...

***

Öləndən sonra da öz daşımız öz başımızın üstündə olacaq...

***

Ağılsız ağıllıya ağıl qoyanda ağıllının da ağlı qaçır...

***

Şair, özü ilə özü arasındakı fırtınadan doğan anın şəklini çəkən rəssamdır...

***

Ölüm - ölümü sevənlərin qulu, öndan qorxanların ağasıdır...

***

Toz basmış adamları çırpmaq mümkün olsaydı, səliqə-sahman yaranardı...

***

"Özünü yığışdır" ifadəsi təsadüfi yaranmayıb... Hər gün adam gərək özünü də yığışdırsın...

***

Cismimizin çəkisini ayaqlar çəksə də, ruhumuzun çəkisini başımız çəkir...

***

Dərinə gedəndə havasızlıqdan, dayazda olanda mənasızlıqdan boğuluruq...

***

Çəkisi yüngül olanlar daha yüksəyə atıla bilir...

***

Üzsüz adama üz verə-verə üzlü edirik...

***

Dilimizin altında olsaq da, sözümüzün üstündə durururq...

***

Əl uzada bilmirsənsə, ayaqlarını yığışdır...

***

Ürək başdan aşağı olsa da, ürəyimizə daman başımıza gəlir...

***

Oturduğumuz yer bizi deyil, biz oturduğumuz yeri yuxarı başa çevirə bilərik...

***

Yuxarı başda oturmaqla baş yuxarı olmur...

***

Kiminsə gözü səni götürə bilmirsə, demək ki, çəkin çox ağırdır...

***

Adamlardan zəhərlənəndə ürəyin bulanması uzun çəkir...

***

Köçənlər bizdən köçərlər... Bizsə köçənlərə köçərik...

***

Ağaclar da yarpaq torpağa düşəndə ağlayır yəqin...

***

Sözlər də can verir... hisslər ürəyə çəkilib, yarımcan duaların hərflərindən düşürlər...

***

Gözləmədiklərimiz gözlədiklərimizdən tez gəlir...

***

Xatirənin kölgəsində sərinlik yox...

***

Kitabın bir səhifəsi cırılırsa, hadisələr axsayır - həyat kimi...

***

Özünü tanıyanlar özündən çıxsa da azmaz...

***

Bir fəsil var... Adı - Ayrılıq...

***

Kitablar rəflərdə ölər, masaların üstündə dirilər...

***

Adamlar da kitabdır... Oxunmaq üçündür...

***

Qaçırsan ki, özündən qaçasan, qaçıb özünə düşürsən...

***

Hamı tərcüməçidir - özünü dilinə, hissini sözünə çevirir...

***

Yadıma düşəndə yaddan qaçıram...

***

Ölüb getmək asandı... Hünərin var ölüb qal...

***

Hər şey satılır... Amma... Almağa nəfəs yoxdur...

***

Hamı gözümdən keçir... Sən isə ürəyimdən...

***

Hər insanın yaşı ağlında gizlənir...

***

Doğulandan ölənədək bir nəğmədir hər adam...

***

Bəzən sözlər hissiz, bəzən hisslər sözsüz yetim qalır...

***

Ürəyin saatıyla qolun saatı əks istiqamətə şütüyür - biri geri qalır, biri irəliyə qaçır...

***

Hər şey görünmədiyi kimidir...

***

Yuxular - Tanrının tapmacasıdır...

***

Bu "olmaz"lar olmasa olmaz olaylar olar.

***

Üzümüzün qırışlarında illər, ürəyimizin qırışlarında adamlar, nəfəsimizin qırışlarında ömür gizlənər.

***

Bir iti baş on küt barmaqda bitər.

***

Məntiq ağlın, sevgi ürəyin açarıdır - ələ düşməz.

***

Hamının alın yazısında şablon bir söz var - Borclu...

Xanım İSMAYILQIZI

Ədəbiyyat qəzeti.- 2022.- 9 aprel.- S.17.