Barat Vüsal kimi böyük bir irfan şairinin mənə şeir həsr eləməsi mənə böyük şərəf verir. İndiki şairlərimizdən irfan həyatı ilə yaşayan yaradan ikicə şair gəlir ağlıma - Barat Vüsal Məhəmməd Aslanbəyli. Həm Kosalar mənim üçün çox doğma yerdi, anam orada doğulub, orada boya-başa çatıb. Oranın ab-havası, folkloru nənəmin, anamın çoxsaylı söhbətləri ilə hopub şeir dünyama. orada ustadımız Barat Vüsalın ocağı var. Bu şeir mənim Ustada ehtiramımdır.

 

***

 

Salam olsun, Barat Vüsal!

Axtardığın dan imiş?

Günəş göydə dərvişdisə,

Sübh gözündə qan imiş?

 

Dartılanda yay kirişi,

Açılar göyün girişi,

Can kimi bir dingilişi,

Görən oynadan imiş?

 

Ömür sönür pərdə-pərdə,

Dincliyini gəzmə yerdə,

Torpağa girən qəbirdə,

Cücərən kurqan imiş?

 

Sirr sonsuzdur, çözüm harda?

Bir aşiq var hər diyarda,

Ulu Yurdda - Kosalarda,

Tənha yanan can imiş?

 

Sözü qaltan-qaltan - sən o,

Hələ kəsir baltan - sən o,

Könüllərə sultan - sən o,

Bəs göydəki xan imiş?

 

Elxan Zal Qaraxanlı

 

Ədəbiyyat qəzeti.- 2022.- 26 fevral.- S.17.