Halallıq

Saflıq hər insanın qanında gərək,

Nəslində, kökündə, canında gərək.

Əzəlində gərək, sonunda gərək,

Halallıq alınan-satılan deyil.

Bəlası çox olur dövlətin-varın,

Qiyməti bahadır namusun, arın.

Sayı az olsa da düz adamların,

Yaxşılar pislərə qatılan deyil.

Mərhəmət diləyir sağ da, xəstə də

Bir gizli haray var zildə, pəsdə də.

Zalımlar hardasa son nəfəsdə də

Tanrı qəzəbindən qurtulan deyil.

Məmməd MƏRZİLİ

Ədəbiyyat qəzeti.- 2022.- 26 fevral.- S.27.