Gap

Ey arif olan, söylə o nadanə nəsihət

Kim, getsə dəm əldən, dəxi düşməz ələ fürsət,

Keçsə belə dəmlər, belə günlər, belə illər,

Dünya olacaq başımıza təng, deyirlər.

***

Dəhrin qurulub, çünki ülum ilə binası,

Rövnəq tapub elmiylə hamu millət əsası,

Keçsə belə dəmlər, belə günlər, belə illər,

Dünya olacaq başımıza təng, deyirlər.

***

Zülmət məgər bizlərə irs ilə ətadır?

Bu qəflətə uymaq məgər islamə rəvadır?

Keçsə belə dəmlər, belə günlər, belə illər,

Dünya olacaq başımıza təng, deyirlər.

***

Düşdü qabağa elm ilə hər milləti-naşı,

Kim saldı bizim başımıza, bəs, belə daşı?

Keçsə belə dəmlər, belə günlər, belə illər,

Dünya olacaq başımıza təng, deyirlər.

***

Qaldıq geri, göz bağlı, yürək dağlı, dili lal,

Heç firqə üçün olmasın, Allah, belə əhval,

Keçsə belə dəmlər, belə günlər, belə illər,

Dünya olacaq başımıza təng, deyirlər.

Həsən bəy Zərdabi

Ədəbiyyat qəzeti.- 2022.- 23 iyul.- S.5.