Ülkər GİDNER

 

1980-ci il aprelin 12-də Şabran rayonunda dünyaya gəlib. Tibb texnikumunu bitirdikdən sonra ailə qurub, Amerikaya köçdüyü üçün təhsilini orada davam etdirib. Polis akademiyasına daxil olub yüksək nəticələrlə ofiserlik qazanıb. O, üç şeir kitabının bir neçə mahnının müəllifidir. Bundan əlavə, Ülkər hər zaman öz həmvətənlərinə dəstəkdir. Bir çox ailələrə yardım edir, onların problemləri ilə maraqlanır. Ülkər xanım, eyni zamanda online fəaliyyət göstərən "Ülkər" TV-nin rəhbəri, maliyyəçisidir. Qeyd edək ki, İkinci Qarabağ savaşı dönəmində kanalın əməkdaşları, bir çox şəhid qazi ailələri ilə görüşmüş, mövcud durumu işıqlandırmışlar. Ülkər, həmçinin online fəaliyyət göstərən "Qarabağ" "Ağdam" TV-nin maliyyə dəstəkçisi olmuşdur. Ailəlidir, 3 övladı var. İllərdir Amerikada yaşasa da, hələ Azərbaycan vətəndaşıdır. Amerikada yaşayan məktəbli gənclərə Azərbaycan mədəniyyəti adət-ənənələrinin öyrənilməsi, milli-mənəvi dəyərlərin təbliğatında Ülkərin böyük xidmətləri vardır.

Onun bir neçə şeirini sizə təqdim edirik.

 

***

 

Gözümün nurusan, deyirdin mənə,

Bu eşqlə bir dünya gətirdin mənə.

Sonunda bir ümid vermədin mənə,

Sevməyi bilmirsən, birdəfəlik get.

 

Sönən günəş oldum, batan səs oldum,

Gözümlə qəlbimə yol çəkən oldum,

Od sevgim, səninlə yanan kül oldum.

Sevməyi bilmirsən, birdəfəlik get.

 

Bu necə zülmdür yazıb bəxtimə,

Təsəlli verirəm, sevən qəlbimə.

Ürəyim bir parça bağlı sinəmə,

Sevməyi bilmirsən, birdəfəlik get.

 

Xəyalla, ümidlə yollara daldım,

Hanı o sevdiyim, gəzdim, aradım...

Son ümid gözümdə həsrətlə baxdım

Sevməyi bilmirsən, birdəfəlik get.

 

Dünya

 

Bir dünya istərəm, giley-güzarsız,

Doymayım cahanın gözəlliyindən.

Təbiət pak ola, insan günahsız,

Doymayam aləmin özəlliyindən.

 

Səs salam bəşərə, çata hər yana,

Sözlərim min qida qata hər cana.

Nəğmədən çələnglər ata hər yana,

Doymayam urəyin məzəlliyindən.

 

Ruh verə könlümə əbədi sevgi,

Dünyanın əzəli, ədəbi sevgi.

Könlümün yaşamaq səbəbi sevgi,

Doymayam eşqimin əzəlliyindən.

 

Ülkər GİDNER

 

Ədəbiyyat qəzeti.- 2022.- 28 may.- S.31.