On iki yaşın
sevinci
- Ata, nə olar, az
iç bu zəhrimarı! Ayaq altında diyirlənən
boş araq şüşələrinə nifrətlə baxan yeniyetmə oğlunun bu fəryadına heç əhəmiyyət
vermədi, sanki bu sözləri ona yox, daşa-divara
deyirdilər. Şişkin
gözlərini güclə
açıb oğluna
və evin bir küncündə çarpayıda yatan xəstə arvadına tərəf boylandı. Sərxoş ata hər şeyi qatı duman içində görürdü.
Bu ailənin mizan-tərəzisi
çoxdan pozulmuşdu.
Evə kefli gələn kişi hər gecə yaratdığı qalmaqal,
dava-dalaşla kiçik
yaşlı oğlunu,
yüksək qan təzyiqindən əziyyət
çəkən arvadını,
hətta qonşuları
da boğaza yığmışdı.
Heç bir nəsihəti, yalvarışı
vecinə almırdı.
Oğlunun "ata, sabah mənim ad günümdür,
istərdim ki, bizim də süfrəmizdə
gözəl yeməklər
olsun, sinif yoldaşlarımla bu günü qeyd edim" deməsi də heç nəyi dəyişməmişdi.
Bu sözləri söyləyib
evdən həmişəki
kimi yarıac, yarıtox çıxan oğlan məhəllədə
yaşıdları ilə
qarşılaşsa da, onlara
bənd olmayıb yoluna davam etdi.
Hara gedəcəyini heç
özü də bilmirdi.
Başında qarışıq fikirlər
dolaşırdı: "Niyə
atası qeyri-normal həyat tərzi keçirir. Alkoqol düşkünü olduğu
üçün onu işdən çıxarıblar.
Əcaib hərəkətləri,
kobud davranışı
ilə anamı da xəstə edib. Belə həyat, görəsən, nə vaxt bitəcək?"
Əsən soyuq külək
sanki iliyinə işləyirdi. Gödəkçəsinin
yaxalığını qaldırdı,
əllərini cibinə
qoydu. Yenə də üşüyürdü.
Parkın girəcəyində
payız küləyinin
sovurduğu xəzəl
qalaqları qəribə
bir gözəllik yaratmışdı. Ayaqlarını
qızılı yarpaq
topalarına çırparaq
yeriyirdi. Gümüş rəngli,
parıltılı bir
əşya ayağına
toxundu. Xəzəllərə
tərəf əyilib
diqqətlə baxdı.
Təptəzə "Ayfon"
telefonu idi. Telefonu yerdən götürdü. Hətta sevindi də. Ani olaraq düşündü
ki, "bu bahalı telefonu satsam, xeyli pulum olar,
evimizə çoxlu ərzaq, anama dava-dərman və təzə paltar alaram. Axı, sabah həm də ad günümdür".
Elə bunları götür-qoy edirdi ki, əlindəki telefon zəng çaldı. Bu qəfil zəngdən yamanca diksindi. Telefonun ekranında bu sözlər yazılmışdı: "Anamın
zəngi". Telefonu itirən şəxsin anasının zəngləri
isə bir an ara vermirdi. Övladından
nigaran qalan ana cavab almaq üçün
israrla zəng edirdi.
"Axı, telefonu aça bilmərəm, cavab versəm, telefonu mütləq qaytarmalı olacağam.
Bu, sanki oğurluq malı gizlədən, həyəcandan əlləri
titrəyən oğlanın
düşüncələri idi. Birdən öz anasını xatırlayıb qeyri-iradi telefonu açdı və cavab verdi.
- Kimsiniz, qızımın telefonu niyə sizdədir? Neçə saatdır ki, qızımla
danışa bilmirəm.
Onun başından bir tük əskik
olsa... - Ana qırıq-qırıq
danışır, qəhər
onu boğurdu.
- Qızınız barəsində
heç nə bilmirəm. On dəqiqə
öncə bu telefonu xəzəllərin
arasından tapmışam.
- Bəs mənim qızım hanı? Siz özünüz indi hardasınız? Parkın sağındakı
kiçik bağda? Nə olar, mənə
qızımdan bir xəbər deyin... Deməli, o, haradan keçibsə, telefonunu orada itirib. Yəqin
yaxın məsafədədir.
Telefonu söndürməyin
lütfən... İndi maşına
minib gəlirəm.
Oğlancığaz ananın təlaş dolu səsini dinləyə-dinləyə
sövq-təbii qızın
axtarışına çıxmışdı.
Qaş qaralır, parkdan əl-ayaq çəkilirdi. Kiçik
bağda da sakitlik idi. Yamyaşıl, sıx çətirli ağacların arasındakı
skamyada tənha bir qızın oturduğunu görüncə,
ona yaxınlaşdı.
Gənc qızın bənizi qaçmışdı,
solğun çöhrəsindən
şiddətə məruz
qaldığı duyulurdu.
Ağ köynəyinin
qolları kəsik-kəsik
olmuş, pərişan
saçları kürəyinə
dağılmışdı.
Qıza
yaxınlaşıb:
- Siz telefonunuzu itirmisiz? - deyə soruşdu.
Qız qəfil sualdan diksindi:
- Bunu hardan bildiniz?
- Sizin
"Ayfon"u tapmışam.
Alın, ananızla danışın.
Gözlənilməz təklifdən şaşıran qız ağlamsınaraq anasına
bunları nəql edirdi:
- İki nəfər üstümə şığıdı.
Ətrafda kimsə gözə dəymirdi. Başıma-gözümə vurmağa
başladılar. Məndən
pulumu və telefonumu istəyirdilər.
Lap vəhşiləşmişdilər. Yekəpər oğlan çantamı alıb qaçanda o birisi də onun dalınca
yüyürdü. Mən
cibimdə gizlədiyim
telefonumu gücüm çatınca uzağa - xəzəl tökülmüş
dar cığıra tulladım. Düşündüm
ki, sonra özüm tapıb sənə zəng edərəm, dalımca gələrsən.
Nə illah etdimsə, gözümə
dəymədi, heç
cürə tapa bilmədim.
Üzgün görkəmdə
və pulsuz evə necə qayıdaydım? Sonrası
isə artıq sənə bəllidir... Kaş belə bir qardaşım olaydı, ana...
Ertəsi
gün səhər sərxoş kişinin qapısı döyüldü.
Başı bədəni
üstündə güclə
dayanan, gecəki kefliliyindən bir az ayılan kişi gözəl geyimli, şux qamətli bir xanımı kandarda görəndə təəccübünü
gizlədə bilmədi.
Qadın gətirdiyi hədiyyələri, pal-paltarı,
ərzaq bağlamalarını
və zərfin içinə qoyduğu pulu elə dəhlizdəki
kiçik masanın üstünə düzüb:
- Çox tərbiyəli, ağıllı oğlunuz
var, - dedi. Onun yerinə başqası olsaydı, tapdığı
bahalı telefonu heç qaytarmaq barədə düşünməzdi.
Üstəlik o, hələ oğru-cibgirlərin əlindən
qurtulmuş qızımı
bu telefonla tapmaqda mənə kömək eləyib. Daha
hansını deyim... Kaş mənim də belə bir fərasətli, zirək oğlum olaydı... Hədiyyələr
onundur. Bu azyaşlı,
saf ürəkli oğlanın yaxşılığını
heç vaxt unutmarıq.
Oğlunun ünvanına birnəfəsə
deyilən xoş sözləri, alqışı
eşidən ata yerində donub qalmışdı. Dumanlı
gözləri ilə bu çağırılmayan
qonağa baxır, yaraşıqlı, qədd-qamətli
xanımın söylədiklərini
dinləyirdi. Qonağın
hüzur dolu səsi o qədər məlahətli idi ki! Evin bir küncündə, çarpayıda yatan xəstə ana yorğan-döşəkdən
silkinib ayağa qalxmış, dəhlizə
çıxmışdı. Maraqlı mənzərə
idi.
Hekayəmizin azyaşlı qəhrəmanı
isə gözə dəymirdi. O, dəhlizə
açılan qapının
arxasında dayanıb
ötən günün
olayları barədə
düşünürdü. Qızına görə dünən sıxıntı
keçirən ana ilə
də görüşməliydi.
O, irəli yeriyib qadınla köhnə tanışlar kimi salamlaşdı və onu içəri dəvət etdi:
- Təsadüfə baxın
ki, bu gün mənim ad günümdü,
on iki yaşım tamam olur. Gəlin,
birlikdə qeyd edək!
Kimsəsizin dərdini özününkü
bil...
Qonşu
məhəllədəki yataqxanada
neçə ildir ki, qaçqınlar yaşayır.
Bət-bənizi qaçmış,
çirkli eyvanları,
sınıq-salxaq qapı-pəncərələri
ilə gözümüzü
yağır edən,
Birinci Qarabağ savaşından
ağır miras qalmış bu binada, dünyanın, bəlkə, ən gözdən-nəzərdən kənar guşəsində
gözə dəyən
adamların başı
daim qeylü-qallıydı.
Üzbəüz binada
yaşadığımız üçün buraya girib-çıxanların, gündəlik
ruzisini evinə daşıyan, ağır
çantalarını çiynindən
çıxarıb qırıq-sökük
pillələri qaçaraq
qalxan uşaqların səs-küyünə çoxdan
alışmışdıq.
Bir gün dərs dediyim məktəbdən çıxıb evə gələndə yataqxananın
girişinin rəngbərəng
lentlərlə, çiçəklərlə
bəzədildiyini gördüm.
Doğrusu, çox sevindim. Qaçqın-köçkün
qonşularımızın bomboz, yeknəsəq həyatına bir istilik, yeni nəfəs qatılacağı içimə
xoş hisslər doldurmuşdu. Qarşıma
çıxan ağbirçək
anadan "Kimin xeyir işidir?" - deyə soruşdum. "Rəna bu gün
gəlin köçür"
cavabını eşitdim.
Rənanın nənəsinin
çuxura düşmüş
gözlərində sevinc
işartıları açıq-aşkar
duyulurdu:
- Müəllimə, sizi də məclisimizə dəvət edirik, - deyib getdi.
Bu dəvətə görə,
əslində qürurlandım.
Düşündüm ki, axar-baxarlı
yurd yerini, isti ev-eşiyini itirmiş, şəhərin
bir küncündə,
darısqal yataqxanaya sığınmış bir
ailəyə hansısa
hədiyyəmlə yardımçı
ola bilərəm. Üzügülər,
mehriban Rənaya kiçik siniflərdə
dərs demişdim, xətri mənə əziz idi. Qızcığaz gözümüzün
qabağında böyümüşdü.
Bu gün isə o, ağ gəlin duvağına bürünüb
gəlin köçəcək,
bir evin çırağını yandıracaqdı.
Evdə
qərar tuta bilmirdim, toy evinə getməyə tələsirdim.
Yataqxananın ikinci mərtəbəsinə qalxanda
xeyli qonaq-qara ilə, amma nədənsə
narahat bir mənzərə ilə qarşılaşdım. Hərə
bir tərəfə vurnuxur, nəyisə axtarırdı. İçəri
girib Rənanın anası və özü ilə görüşdüm. Onların
da təlaş dolu çöhrəsi gözümdən
yayınmadı:
- Nə olub, nə
baş verib?! - deyə soruşdum.
- Elə bir işə
düşmüşük ki, müəllimə, bilmirik,
nə edək! Rənanın nişan üzüyü itib. Neçə saatdır ki,
hər yeri axtarırıq, tapılmır
ki, tapılmır.
Qızın anası doluxsunmuş
gözlərini yaylığının
ucuyla sildi:
- Nişan üzüksüz
də gəlin köçər?! Başıma
haranın daşını
töküm?!
Rənanın isə həyəcandan
sanki dili tutulmuşdu. Güc-bəla
ilə:
- İndi
mən nə edim? - deyib köksümə
sığındı.
Gətirdiyim xonçanı hələ
də əlimdə tutmuşdum. Heç mən də nə edəcəyimi bilmirdim. Rənanı bağrıma basıb yanında oturdum. Başımda yüz fikir dolanırdı: çətin duruma düşən qıza necə kömək edim?
Vaxt keçir, köhnə divar saatının aramsız çaqqıldayan
əqrəbləri toya
lap az qaldığını
yadımıza salırdı.
Xeyir işə gələn qohum-əqrəbanın
əndişəsi, itiyini
axtaranların səs-küyü
gərginlik yaradırdı.
Ani olaraq ağlıma bir fikir gəldi.
Rənanın anasına:
- Beş-on dəqiqəyə
qayıdıram, - deyib
pillələri sürətlə
endim.
Binaya çatıb, mənzilimə
necə qalxdığımı
indi güclə xatırlayıram. Bəzəkli
incə qutuda saxladığım təzə
nişan üzüyünü
paltar dolabımdakı
mücrüdən götürüb
evdən çıxdım
Əsgərlikdən yenicə qayıtmış oğlum
üçün arzu-kamla
aldığım nişan
üzüyünü əlimdə
bərk-bərk tutmuşdum.
İti addımlarla gedir,
sanki yüyürürdüm.
Rəhmətlik anamın
"kimsəsizin dərdini
həmişə özününkü
bil" nəsihətini
yaddaşımda çözələyirdim.
Qutudakı üzüyü
Rənanın barmağına
taxanda ağ paltarlı mələyə
elə bil dünyanı bağışladılar.
Hamı təəccüb
içində bir-birinə
baxırdı. Qız
anasının sevinc və həyəcandan dili söz tutmur,
necə təşəkkür
edəcəyini bilmirdi.
Elə bu vaxt "Vağzalı"nın
gur sədaları ətrafa
yayıldı. Oğlan
adamı gəlini aparmağa gəlmişdi...
Qız köçürən ananın
göz yaşları titrəyən yanağı
boyunca süzülürdü.
Mən də kövrəlmişdim, sevinc
göz yaşlarıma
hakim ola bilmirdim.
Bu hadisədən xeyli vaxt ötüb. Amma bu olayı indi
də xoş bir duyğutək xatırlayıram. Odlu Qarabağ
cəbhələrinin udduğu
gənc həyat yoldaşımın surəti
gözüm önündən
çəkilmir. Atasız
böyütdüyüm oğlum
az sonra ailə qurarkən uca Yaradanın mənə yox yerdən necə qapılar açdığını,
Allahın bu xeyir işə də zamin olduğunu
heç vaxt unutmuram.
Məhərrəmli Zemfira
Ədəbiyyat qəzeti.- 2023.- 19 avqust.- S.12.