Görkəmli gürcü şairi, nasiri və publisisti Davit Şemokmedelinin minimal poeziya nümunələri müasir gürcü ədəbiyyatında yeni bir çalar kimi qəbul olunur. "Ucalıq", "Sükutun səsi", "Payıma düşən səma", "Solğun mənzərələr", "Sözlərdən o yanda" və "Quşlar qışda niyə ağlayır" kitablarının müəllifidir. Gürcüstanın "Davit Ağmaşenebeli", "Qalaktion Tabidze", "Nİko Lortkipanidze" və İvane Maçabeli" mükafatları laureatıdır.

***

Ey uca asiman,

Sən də təhlükəsiz deyilsən demək, -

Dünən qırğı keçdi göyün üzündən...

***

Günəş batsa da

Mənim evimin qənşərində

İşıq saçırdı qar çiçəkləri.

***

Sevib-seviləndə

əllərim çatırsa asimanlara,

demək, göy sən deyən uzaq deyilmiş.

***

Mən neçə misra pozmalıyam ki,

Səni bircə sözün içində tapım?..

***

Köhnə zirzəmiyə düşən şəfəqtək,

Düşdü ürəyimə sənin gözlərin...

Zirzəmi necə də gözəlmiş, gülüm.

***

Mənim yuxusuz gecələrimdən

Sənin əbədi yuxuna qədər

Neçə bahar, neçə qış var,

Ay ana!

***

Ananın gəlişi, ayaq səsləri -

Ürək döyüntüsüdür sanki Tanrını...

***

Kəndimin cığırı,

Aparırsansa,

Apar, apar məni uşaqlığıma,

Məzarlığa tərəf niyə dönürsən?..

***

Evə qayıtdım,

Məlum oldu ki,

Heç vaxt, heç yana

Getməmişəm mən.

***

Hayana üz tutub gedirsiz, quşlar,

İsti ölkələrə çatana qədər

Siz mənim buludlu asimanımı

Qət etməlisiz.

***

Gül-çiçək içində

Gördüm mən səni,

Cəh-cəh vuran quş...

Amma bilmədim

Kimin üçün oxuyurdun sən o nəğməni...

***

Səmadan vətənin qəmi yağırsa,

Yağışdı demə,

O qəm damlaları qəlbə damırsa,

Nə xoşdu demə.

***

Bax, orda tər çiçək durub tək-tənha,

Günəş o çiçəyin kölgəsini

Doğdu bu səhər.

Gecə

Günəş hamı üçün günəşdir, amma

Mən heyran olmuşam işıldaquşa.

***

Əyilib tər çiçək dərmək istədim,

Əlimdən sürüşdü çiçəyin tağı,

Yalnız uşaqlıq xatirələri

Qaldı əlimdə.

***

Heç vaxt analığım olmayıb deyə,

Anam bu dünyadan elə köçdü ki,

Bilmədim mən onun qədrini, Allah.

***

Sənin həyatında qadın qəflətən

Tozanaq qaldıran bir çovğun kimi

Hər şeyi alt-üst eləməyibsə,

Demək, bu dünyada yaşamamısan...

Məhəbbət

Həyatın mənası elə odur ki,

Boşluqlar

İlahi işıqla dolsun.

***

Özümdən çıxanda sən küsmə məndən,

Bahar gecikəndə günün də üzünə

Ağ olmuşam mən.

***

Qonşunun bağından oğurladığımız

Meyvə qədər şirin və dadlı idi

O gecə, gülüm...

***

Bar gətiribsə,

Hər şey bəllidir.

Yarpaqlarının xışıltısından

Tanınmaz ağac...

***

Danışa biləndə sənin gözlərin

"Sevirəm" sözünü demədi mənə.

İndi hisslərimin məzarlığında

Hər səsə karam...

***

Şair öləndə,

Bir dərd çəkəni ölür dünyanın.

Bax, buna görə də dərd ağırlaşır.

***

Yad -

Şair varlığının açarıdır

Bu söz əzəldən…

***

Həyat

Doğrudan da haqlılığına

Həm özünü, həm də özgələrini

İnandırmaqdır…

***

Ömürlə ölümün arasındakı

Bu körpü ki var,

Zülmətdə sayrışan şəfəq kimidir...

***

Nifrəti dəf edib, dəfn elədin sən,

İndisə əndişə bürüyüb səni,

Deyirsən nifrətsiz

Sevgi-məhəbbətim yaşayacaqmı?

***

Məktəb partasında qoyub getdiyin

O tər gözəllik

Qar kimi əriyib, xəbərin varmı?

İçimi göynədir inişilki qar...

***

Eh, adın bahardı,

Amma gəlişin

Soldurur bağımın çiçəklərimi...

***

Köhnə niqablarla vidalaşmaq faciə deyil,

Elə bil, bezdiyin oyuncaqları

Atdın ki, gedib təzələrini

Alasan sabah…

***

Mən səni axtardım... axtardım, tapdım,

Odur ki, tapanda sən tək deyildin,

Yalqızlığın da yanında idi.

***

Sən ki bülbülün nəğməsinə də

dodaq büzürsən,

Mənim için-için ağladığımı

Eşidərsənmi?!.

Davit Şemokmedeli

Orijinaldan tərcümə: İmir MƏMMƏDLİ

Ədəbiyyat qəzeti.- 2023.- 11 fevral.- S.24.