Pyer Paolo Pazolininin son müsahibəsi:
"Siyasi
olmayan heç nə yoxdur"
İtalyan kinorejissoru, şair
və yazarı Pyer Paolo Pazolini 1922-ci il martın
5-də Roma yaxınlığında yerləşən Ostio vilayətində doğulub.
Rejissorluqdan əvvəl şairliklə
tanınan Pazolini 17 yaşından şeir yazmağa başlayıb.
İlk şeirləri 19 yaşında
çap olunub. Rejissorun şeirləri İtaliyada
məktəb proqramına
daxil edilib.
Orta məktəb illərində zabit olan atasının işi ilə bağlı olaraq İtaliyanın şimalındakı
müxtəlif şəhərlərdə
oxuyub. Bolonya
Universitetində incəsənət
tarixi və ədəbiyyatı üzrə
ali təhsil
alıb. İkinci Dünya müharibəsi
illərində Friuli bölgəsində
təzyiq altındakı
kəndlilərlə keçirdiyi
vaxt onun sonrakı dövrdə marksizmi mənimsəməsində
mühüm rol oynayıb. Özünü
ateist adlandırsa da, özünəməxsus
dünyagörüşü və müqəddəs dəyərlərə sədaqətini
qoruyub saxlayaraq marksizmi xristianlıqla uzlaşdırmaq cəhdi onun ətrafındakıları
da heyrətə salıb.
1950-ci illərdə
Romada kasıblıqla
keçən həyatı
onun "Ragazzi di vita" ("Həyatın
oğlanları", 1955) və
"Una vita violenta"
("Mərhəmətsiz həyat",
1959) adlı ilk iki romanına mövzu olub. Romanın xaraba
məhəllələrinin yoxsulluğunu və səfalətini sərt realizmlə araşdıran
bu romanlar onun "Accattone"
("Dilənçi", 1961) adlı ilk filminə bənzəyirdi. Hər
üç əsər
də oğrular, fahişələr və Romanın yeraltı dünyasından olan digər insanların həyatınlarından bəhs
edir.
Rejissor, sosial tənqidi
əks etdirən, qeyri-ənənəvi üslubu
ilə diqqət çəkən filmləri
ilə daim müxtəlif təbəqələr
arasında mübahisələrə
səbəb olub. Onun ən məşhur filmi "II Vangelo secondo Matteo" ("Müqəddəs Mattaya görə İncil",
1964) Hz. İsanın həyatı
və ölümündən
sadə, sənədli
üslubda bəhs edir. Komik alleqoriya janrında
olan "Uccellacci e Uccellini" ("Şahinlər
və sərçələr",
1966) filmindən sonra
"Edipo Re" ("Kral
Edip", 1967) və
"Medea" ("Medeya",
1969) filmlərində mifoloji
hekayələri çağdaş
perspektivlə canlandırmağa
çalışıb. O, məşhur soprano Mariya Kallasın rol aldığı "Medea"
filminin bir hissəsini Türkiyədə
çəkib. "Teorema" ("Teorem",
1968) və "Porcile"
("Donuzxana") kimi
filmlərində siyasi
və dini baxışlarını çatdırmaq
üçün erotizm,
zorakılıq və
korrupsiyadan istifadə
etməsi Katolik kilsəsinin mühafizəkar
təbəqəsi ilə
münaqişəyə səbəb
olub.
XX əsrin
70-ci illərinin əvvəllərində
Pazolini Şərq ölkələrinə səfər
edib. İran, Yəmən,
Nepal kimi ölkələrə
səfərində məqsəd
sonradan çəkəcəyi
trilogiyası üçün
məlumatlar toplamaq olub. "II Decamerone"
("Dekameron", 1971) və
"The Canterbury Tales" ("Kanterberi nağılları", 1972) filmləri
ilə Orta əsr erotizmini nümayiş etdirib.
Bu filmlər, 1974-cü ildə çəkilən
"Ilfiore delle mille e
una notte" ("Min bir gecə nağılları",
1974) filmi ilə trilogiya təşkil edir. Pazolini, həmçinin, bir çox şeir kitabları və ədəbi tənqid topluları nəşr etdirib. Onun bir neçə
romanı da mövcuddur.
Tez-tez öz filmlərində epizodik rollarda çəkilən
rejissorun həyatı
da ən azı filmləri qədər tənqid olunub. Homoseksuallığını
gizlətməyən Pazolini
katolik ailəsində
böyüsə də,
özünü "ateist"
kimi təqdim edib. Filmlərinə ailə üzvlərini,
dost-tanışlarını, qeyri-peşəkar aktyorları
cəlb edib. "Müqəddəs Mattaya görə İncil" filmində Məryəm rolunu rejissorun anası, İsa rolunu isə İspaniyadan olan 19 yaşlı tələbə oynayıb.
Pazolininin döyülmüş, üzərindən avtomobillə
keçilmiş cəsədi
1975-ci il noyabrın 2-də səhər
saatlarında Roma yaxınlığındakı
Ostio kurortunun yaxınlığındakı boş
sahədə tapılıb.
Qətlinə görə
müəyyən şəxslər
həbs edilsə də, bu cinayət
İtaliyanın açılmamış
sirlərindən biri olaraq qalır.
Təqdim etdiyimiz müsahibə
1975-ci il oktyabrın 31-də alınıb.
Həmin
ərəfədə rejissor
son filmi "Salo və ya Sadomun
120 günü" filminin
təqdimatı ilə
bağlı müxtəlif
ölkələrdə səfərlərdə
olub. Skandinaviyadan qayıdan Pazolini
Fransada dayanıb.
Parisdə "Antenne-2" kanalında qonaq olan rejissorun
bu müsahibəsi
"Dix de Der" verilişində
lentə alınıb.
İlk dəfə
2005-ci il dekabrın 12-də ictimaiyyətə
təqdim edilib. Müsahibə Pyer
Paolo Pazolininin 1975-ci il
noyabrın 1-də hücuma
məruz qalmasından
əvvəl hazırlanan
son televiziya reportajıdır.
- Son filminiz
("Salo") ekranlara
çıxanda bizi daha bir qalmaqal
gözləyir?
- Yox. Düzgün olan, insanların
qanını dondurmaqdır,
qalmaqallı olmaq ləzzət verir. Qalmaqallı olmağın həzzini inkar edən insan, sizin də
bildiyiniz kimi, əxlaqçıdır.
- Seks siyasidir?
- Təbii ki.
- Skatologiya?
- O da. Siyasi olmayan heç
nə yoxdur.
- Kannibalizm?
- Bəzi yerlərdə bu, siyasidir və
real hadisədir. Digər yerlərdə
bu, siyasi metaforadır.
- Siyasi düşmənlərinizdən
yaxa qurtarmağın ən yaxşı yolu budurmu?
- Baxın, yaxın günlərdə Svift (Conatan Svift - ingilis-irland əsilli satirik yazar) kimi iki dürüst
təklif etdim: İbtidai sinif müəllimlərini və
italyan televiziya rəhbərlərini parçalayarak
yemək.
- Çox sərt deyil?
- Mədəmiz möhkəmdir.
- Burjua və burjuaziyaya qarşı həmişə
nifrətiniz var?
- Bu, nifrət deyil, daha çox həm artan, həm də azalan bir şeydir.
Təəssüf ki, bu məqamda nifrətə etiraz edirəm, çünki İtaliyada hamı burjualaşıb.
- Yaxşı, burjualar filmlərinizdən birinin uğurunu keçsə, bu, sizi məyus
edər?
- Burjualar heç vaxt belə bir şey edə
bilməz. Bunu etsə-etsə elit
burjualar edər ki, mən özüm
də onların içindəyəm.
- Niyə vuruşmursunuz?
- Nə mənada?
- Siz artıq siyasi döyüşçü deyilsiniz.
- Siyasi mübarizədə əvvəlkindən daha çox iştirak edirəm. Heç vaxt heç
bir partiyanın üzvü olmamışam.
Müstəqil marksistəm. Mübarizəni davam etdirirəm.
- Küçədə
insanların sizi söydüyü vaxtlar üçün darıxırsnız?
- Hələ də söyürlər.
- Bu sizə zövq verir?
- Söyüşü geri qaytarmıram, çünki
mən əxlaqçı
deyiləm.
- Siz hansını
seçirsiniz? Şair, yoxsa
yazar? Ssenarist, aktyor, yoxsa tənqidçi?
Yaxud da rejissor?
- Pasportumda "yazar" yazılıb.
- Belə bir sirdən, "Sadomun 120 günü"ndən
niyə hər yerdə danışdınız?
- Bütün əsərlər
sirlə doğulmalıdır.
"Salo" filmini digər filmlərimdən daha çox müdafiə etməli oldum, çünki filmdə qaçılmaz, qəfil təhlükələr vardı.
- Qəfil təhlükələr deyəndə
nəyi nəzərdə
tutursunuz?
- Qalmaqallı olmağın
həzzini rədd edən bir əxlaqçının
hücumunu.
- Siz müharibə illərində
İtaliyada qurulan respublika modelini yaratdınız. "Salo" bir
az da Fransada
işğal zamanı
yaradılan "Vişi
rejimi"nə bənzəmir?
- Bəli, Vişi ilə eynidir.
- Bu yer tam olaraq haradadır?
- İtaliyanın şimalındadır,
paytaxtı Salo. Filmin adı
da buradan gəlir.
- Bəs, onu kim yaradıb?
- Məncə, nasistlər tərəfindən az qala dəli
olmaq həddinə çatdırılan Mussolini.
- Tənəzzül
mərhələsində olduğunu
deyirsiniz?
- Böyük Qərb
kapitalizmi dövründəki
tənəzzül yox,
Hitler dövründəki tənəzzül.
- Filmdə yüzlərlə
cavan kişi
və qadın aktyorların qorxunc və şiddətli münasibətə boyun əydiyini, təhqirlərə
və işgəncələrə
məruz qaldığını
bilirik. Bu gəncləri
necə bir yerə topladınız?
- Bunu edərkən Markiz de Sadın sehrli rəqəmlərini
izlədim, 4 rəqəmi
kimi. Qurbanlar ümumilikdə yüz
yox, iyirmiyə yaxın idi. Onları seçərkən digər
filmlərimdə də
etdiyimi etdim. Yüzlərlə insanla tanış oldum və yalnız
uyğun olanları seçdim.
- Bunlar mazoxist aktyorlardır?
- Seçdiyimə görə,
demək, hamısı
mazoxistdir.
Hazırladı: Nilufər Hacılı
Ədəbiyyat qəzeti.- 2023.- 4
mart.- S.10.