Yuxuda nə görüb bu qız?

On yeddisində bir qız

yolda öz-özünə gülümsəyəndə

Ya dalınca Ay gəzir,

Ya da üzündə-gözündə Ay işığı.

Vaqif Cəbrayılzadə

Ayrılmayıb yuxusundan,

Yuxudakı duyğusundan,

Üzü gülüş, sözü gülüş,

Üzü Günəş, sözü Günəş -

Yuxuda nə görüb bu qız?

Bu gecə qəlbində yatıb,

Gözlərində doğub Günəş.

Gözlərindən baxır Günəş -

Yuxuda nə görüb bu qız?

Qanadı olsa uçar,

Qucar mavi səmanı.

Sevindirmək istəyir

Sevinciylə hamını.

Dönüb göy üzünə üzü,

Günəşi gəzdirir gözü.

Yumuldu, qatdandı dizim -

Yuxuda nə görüb bu qız?

Rəşad Məcid

Ədəbiyyat qəzeti.- 2023.- 30 sentyabr.- S.18.