Mənim gözəl Şahanəm

"İran nəğmələri" silsiləsindən

Mənim gözəl Şahanəm, Şahanə gülüm mənim!

Şimallı olduğuma doğmasan, yoxsa belə?!

Zəngin səhralarlıyla məşhurdur elim mənim,

Bənzəyir ay nurunda üzən zəmi məşələ;

Mənim gözəl Şahanəm, Şahanə gülüm mənim.

Şimallı olduğuma doğmasan, yoxsa belə,

Orda ay burdakından böyükdür neçə dəfə,

Şiraz çox füsunkardır, ancaq mən yenə hələ.

Uçmağa tam hazıram Ryazanım tərəfə;

Şimallı olduğuma doğmasan, yoxsa belə?!

Zəngin səhralarıyla məşhurdur elim mənim,

Bənzəyir zəmiləri qızılı saçlarına...

Dola barmaqlarıma, ağrımaz əlim mənim,

Vurğunam öz yurdumun yaşıl yamaclarına;

Cənnət məkanı ilə məşhurdur elim mənim.

Bənzəyir ay nurunda üzən zəmi gözələ.

Qıvrım saçlarıma bax, telimdən tanı məni,

Zarafat et, gülümsə, düşməz bu anlar ələ,

Salma ancaq yadıma, salma, gülüm, Vətəni;

Bənzər ay işığında üzən zəmi gözələ.

Mənim gözəl Şahanəm, Şahanə gülüm mənim!

Şimalda, o diyarda sənə bənzər qız da var,

Tanrım, insan insana bu qədər necə oxşar!

Bəlkə də mənim haqda düşünür o gözəl yar,

Mənim gözəl Şahanəm, Şahanə gülüm mənim!

Deyirdin ki, Sədi...

Təəccüblü nə var, sən

Onun zövqünə bir bax! -

Gözəli sinəsindən

Öpürmüş Sədi ancaq.

Oxudun: - "Fərat üçün

Gözəldir gül gözəldən".

Mən isə həyat üçün,

Oxuyardım əzəldən.

Gözəlsə də qızılgül,

Ona çox gözəl demə -

Sözlərimi eşit, bil,

Yoxdur tay Şahanəmə.

Ruhum var, azad quşam,

Bezdim boş adətlərdən;

Şairtək doğulmuşam,

Şairtək öpürəm mən.

Olmamışam

Bosforda mən

Bosforda heç olmamışam,

Ordan mənə vermə sual.

Heykələ dönüb qalmışam

Mavi gözlər önündə lal.

Bağdada da getməmişəm

Tacir karvanlarıyla mən.

Orda alver etməmişəm,

Düşmüşəm anca taqətdən.

Fikirdən yordum dözümü -

Əbədi nə var dünyada?

Axır ki tapdım özümü;

- Mən şairəm Rusiyada!

Sızıldadır qarmon səsi,

İtlər hürür üzü aya,

Fars gözəli, var həvəsin -

Gedək o mavi dünyaya?

Hüzuruna gəldim, yarım,

Çağırdın eşq ünvanına.

Sənin zərif barmaqların

Döndü durna qanadına.

Qoy unudum keçmişimi,

Rahatlıq hopdur qanıma.

Yoxdur ölkə ölkən kimi,

And içirəm bu canıma.

Unutdur qarmon avazın,

Dadım bu gül nəfəsindən.

Yolumu gözləyən qızın

Qaçmayım görüşünə mən.

Bosforda olmadım, xeyr,

Uydurram bir şey... istəsən;

O gözlər daşır, kükrəyir,

Ruhuma od püskürürsən.

Qövr eləmir

köhnə yaram

Qövr eləmir köhnə yaram,

Sancı qopmur ürəyimdən.

Udub mavi çiçəklərin

Ətrini, məst oluram mən.

Tehranda bir çayxanada

Çayçı pürrəngi çay verdi.

Araqla, çaxırla deyil,

Bu çayla sağaldı dərdim.

Ağa, ətirli çayını,

Qoy tez-tez içməyə gəlim.

Çadra altdan burda mənə

Baxır bir İran gözəli.

Bizdə qızlar azaddırlar,

Azaddır sevgiləri də.

Bizdə görüş könüllüdür,

Bal dadır öpüşləri də.

Nə gözəldir bu ay üzlü,

Cana gəldim, inan mən də.

Xorasan şalı verərdim,

Şiraz xalçası üstündə.

Süz, ağa, süz o bal çaydan,

Dilim yalan satmaz sənə;

Mən özümə cavabdehəm,

Sənsə cavabdeh özünə.

Çox boylanma bağçaya da,

Başqa qapısı var yenə.

Əbəs yerə göz vurmurdu

Çadra altdan o qız mənə.

Dəllaldan sordum bu gün

A dəllal, yarım tümən

Neçə manat eyləyər?

Açımmı qəlbimi mən

Fars gözəli Laləyə?

Bu gün yenə də sordum,

Öyrətsin məni deyə:

- Necə başa salım mən

Öpüş sözün Laləyə?

Sığmırdım yerə, göyə,

Sıxılırdı ürəyim.

Necə deyim Laləyə

Sənsən mənim gərəyim?!

Dinlədi gülə-gülə -

Dəllal hal əhli idi.

Dedi: - Qızı söz ilə

Ələ almaq çətindi.

Öpüşün yoxdur adı,

Dodaqda qalmır izi.

Tanrı belə yaradıb -

Gül ətri verir özü.

Kim eşqə əbəs deyər?

Sevinci, kədəri var.

"Mənimsən" o kəs deyər

Çəkər, çadranı atar.

Sergey Yesenin

Tərcümə etdi:Valeh MİRZƏ

Ədəbiyyat qəzeti.- 2025.- 25 aprel, №14.- S.32.