Huşyar 1905-ci ildə doğulub. 1941-1945-ci illərdə 21 Azər hərəkatına qoşulub. Azərbaycan Milli Hökuməti süqut edəndən sonra Huşyar barədə məlumat yoxdur. Şəhid edildiyi güman edilir.

Gülsün

Tez ol, ey lalə, açıl, dağ ilə səhra gülsün,

Rəngi-əlvanını görsün, hamı dünya gülsün.

Müjdəsin ver hamı bilsin ki, gəlir fəsli-bahar,

Eşq ilə şövqə gəlib bülbüli-şeyda gülsün.

Səni görsün, çiçək açsın bu diyarın çəməni,

Bizim ellər də edib yaxşı tamaşa, gülsün.

Laləsiz hüsni nədir Azərilər torpağının,

Gərək açsın çəmənində güli-həmra, gülsün.

Ey vətən, tarixə yazdım bu gözəl günlərini,

Eylədin bayraği-hürriyyəti bərpa, gülsün.

Güllər ilə vətənə bir elə ziynət verəsiz,

Nəzər etsin o gülə, rəhbəri-şura gülsün.

Huşyaram, vətən uğrunda gərəkdir çalışam,

Dəftərimlə qələmim əldə hüveyda gülsün.

HUŞYAR

Ədəbiyyat qəzeti: xüsusi buraxılış.- 2025.- 12 dekabr, №49-50.- S.11.