Kiçik şeirlər

Qardaşım Günələ

Quş olub uçdu qardaşım...

Ağzımdakı dəni kiminlə bölüşüm?

***

Sənə görə batdım...

Günəşin hər səhər sənə görə çıxdığı dünyada.

***

Anama yalan dedim...

Doğrular öldürürmüş adamı.

***

Bu yaşıl çəmən qardaşımın saçlarıdır.

Uzanıb yaman.

***

Bu duman kimin qaşqabağıdır?

Göy üzünün sarısı kimin kədərlidir...

***

Bu səfil qoca acdı yəqin,

Bu səfil ruh doyub artıq...

***

Bu gölün susqunluğu səni aldatmasın,

Mən eşidirəm ördəkləri

hürküdən o dəli bağırtını...

***

Aynaların qırığında əks olunar doğru

Sınmasa bütov olmaz ömür...

***

Mənim qarım ərimədi,

Mənim suyum donmadı...

***

Həyata satamadın malını,

Ölüm verdi dəyərini.

***

Sən gül kimi açıldın,

Tikan bilib kəsdilər...

***

Qu quşunun nəğməsi uzun olmur,

Sən çox yaşamadın, qu təmizi qardaşım...

***

Günəş Gorgaha düşürmü, görən?

İsidirmi sümüklərini?

***

Bu qarını tanıdınmı?

Tanıdınmı vaxtdan çıxmış ananı?

Bu qocanı tanıdınmı?

Tanıdınmı qardaşını?

***

Ömür yalan imiş,

Bu sarı almanı dişləyəndə bildim bunu...

***

Sənin dörd tərəfin var

Mənim dörd divarım...

***

Nadana qul olduq,

Nəfsimizə paşa.

***

İnsan var - Allah olmaq istəyir,

Allah var - İnsan.

***

Payız sarı deyil...

Payız sənə sarıdır.

***

Güllər solmaz, bir də bitməsə,

Ölüm olmaz, bir də dirilməsək.

***

Bağla kitabını bitdi ömür,

Aç kitabını ömür başladı...

***

Sən içimdə olanı

Özüm özümlə danışıram ancaq.

***

Həyat bu göz qırpımı -

Nə qalıb ki?

Sənə nə gətirim burdan?

Orxan FİKRƏTOĞLU

Ədəbiyyat qəzeti. - 2025.- 26 iyun (№22).- S.5.