Yapon modernist poeziyasından seçmələr

Toki DZÖMMARO

(1885-1980)

Ədəbi təxəllüsü Aikadır. Atası rahib imiş və ənənəvi poeziya janrı sayılan renqada yazdığı şeirləriylə məşhurlaşıbmış. Vaseda Universitetinin ingilis ədəbiyyatı fakültəsində ali təhsil alıb.

Yaradıcılığının ən məhsuldar mərhələsi 1910-cu illərə təsadüf edib. Həmin dövrdə yazdığı şeirlərdə vətəndaşlıq pafosu və sosial etirazlar başılca yer tutmaqdadır. Sonrakı dövrdə, yəni "Asahi" qəzet şirkətində məsul vəzifələr tutarkən, T.Dzömmaro bir sıra ədəbi-tarixi araşdırmalar üzərində çalışmağa üstünlük verib və şairlikdən tamamən uzaqlaşıb.

"Alatoran çağı" adlı

şeir kitabından

***

Heç cür anlaya bilmirəm də -

işləmək üçün yaşamaq lazımdır,

yoxsa ki, yaşamaq üçün işləmək?..

***

"İşləməsəm - kasıb olacağam".

"Amma işləsəm belə,

yenə qurtulmayacağam yoxsulluqdan".

"Hər necə olsa, işsiz-gücsüz

dolaşan deyiləm mən!"

***

Yaponiyada yaşayıb, fikirlərini yaponca,

həm də qorxusuz-hürküsüz dilə gətirmək

artıq təhlükəli sayılmır.

***

Ayaqlarını çarpayıdan sallamaqla

çəkələklərini aradı və tapmadığı üçün

təkrar başını atıb, yatdı...

Tərcümə etdi:

Azad Yaşar

Ədəbiyyat qəzeti.- 2025.- 2 may, №15.- S.32.