Qələbə

İnanmıram gözlərimə -

səni gördüm,

Atam, anam görməyən qələbə.

Otuz illik işğala

Can verməyən qələbə.

Sən kimsəsiz şəhidlərimin

qərib məzarından keçdin.

Viran qalmış evimizin

ot basmış hasarından keçdin.

Sən sevincdən ağlatdın

yurdsuz yurddaşlarımı.

Sevdim, nə qədər sevdim

Sən tökən göz yaşlarını -

Qələbə!

Toxundun qəlbimizin

sarı siminə.

Bütün cahan heyran qaldı

Bu işğalın sən sındıran tilsiminə -

Qələbə!

Barışmadıq bu işğalla,

Yaşamadıq bu minvalla.

Dəmir yumruq silkələdi

dağı, daşı.

Uzun bir tarix yazdı

Əsrin ən qısa savaşı.

Barışmadıq bu işğalla,

Sən qoymadın biz barışaq.

Hər an sənə yetmək üçün

Biz qan tökdük hər qarışa -

Qələbə!

Boylanıram indi azad

torpağıma,

Məğrur-məğrur dalğalanan

bayrağıma.

Gözün aydın, Azərbaycan,

Çevrilmisən düşmənimin

göz dağına!

Adil CƏMİL

Ədəbiyyat qəzeti.- 2025.- 7 noyabr, №41.- S.23.