"Retro" kafesində naməlum adam

Taleyə boyun əyənlərin yığışdığı çayxanada

qədimi aktyorlar,

nimdaş rejissorlar

günlərini keçmişə səyahətlə keçirirlər,

sanki "Yada düşər xatirələr" verilişinə çəkilirlər.

Qoca bir şair ədəbiyyata gəldiyi günü

bəlkə mininci dəfə xatırlayır,

"Çubuş"dan içdikcə ayılır,

ötən əyyamlara bayılır,

Kəbirlinski bu dəfə

nərdtaxta üzərində bəxtini sınayır,

zərlər onu "dü bir"lə mükafatlandırır,

əsəbindən ağlayır

epizodik rolların mahir ifaçısı,

teatr tənqidçisi imiş

bu kafenin çayçısı,

cib kəsməkdə mahirdi qayçısı,

aktyorlar məşqsiz oynayır burda,

həyat özü mizan verir bu tamaşaya,

sonra kənardan baxır bu qarğaşaya,

pərdə enir,

sərxoş şairin qoluna girib səhnəyə,

bağışlayın, çölə çıxarırlar...

Çayxorlar başlarını bulayıb

arxasınca baxırlar

tale oyununda uduzan zavallının...

Sən demə, o, heç şair deyilmiş,

İnkoqnito imiş...

Panik atak

Diaqnoz - nevroz,

taksidə kuryoz;

ünvana çatmamış atdım özümü

Fəhlə parkına,

sürücü zənn etdi dəliyəm,

kənardan baxa bilsəydim özümə,

görərdim ki, necə gülməliyəm...

Hardan tapdı məni panik atak?!

Hücuma keçir səbəbsiz qorxular,

içimdə bir səs elə hey çığırır:

sən bu mənasız qorxuya qalib gəl!

Təmizlə şüuraltı adlı zirzəmini,

odur qorxuların zəmini.

Sarıl bu gözəl həyata,

Son qoy panik ataka,

Odisseyə bənzə -

gözləyir səni İtaka.

İqlim dəyişikliyi

Onda Yer kürəsi cavan idi,

göylərin təvazökar dahisi

keşiş Evans

gecələr ulduz ovuna çıxırdı,

qalaktikaların hərəkət tempini

hesablayırdı,

Yer kürəsi molekullar cənnəti idi.

Yerdə inkoqnitumlar dolaşırdı,

göydə uçan boşqablar.

Teleskopun antennasına qonmuş

poçt göyərçinləri öz ifrazatları ilə

puça çıxartdı bütün fərziyyələri,

məlum oldu ki,

kainatın uşaqlıq şəkillərini

Günəş yandırıb.

Kosmik dövrün ikonası Laykanı xatırlayın,

Xruşşovun zavallı qurbanını,

bu sirrin izinə düşmüş köpək

elə ordaca canını tapşırdı

ağılsız kosmoloqlara,

münəccimlərin ehtiyacı vardı oftolmoloqlara...

İqlim dəyişir - Yer kürəsi özünü yeniləyir,

Dünyanın yaşını kim bilir?

Lövhi-məhfuzda gizlidir o sirr...

Pandora qutusu

Bütün pisliklər

dünyaya Pandoranın əliylə

yayıldı,

onun qutusunda bircə ümid qaldı -

kül altda köz kimi,

milyon illik toz kimi,

daşlaşmış söz kimi...

Dünyanı ikiyə böldü Pandora;

zülmət bir tərəfdə, nur bir tərəfdə,

xeyir bir tərəfdə, şər bir tərəfdə,

nə o tərəfdə dur, nə bu tərəfdə,

yaşa Ərafda...

Sülh çubuğunu

savaş tütünüylə dolduranlar

ləzzət alsa da tüstüsündən,

sən dünya üçün

bir Zəfər nəğməsi oxu,

bütün sərhədlərdən,

məntəqələrdən

səmaya pərvazlansın

göyərçinlər,

qoy Pandoranın qutusu

bütün pisliklərin məzarı olsun.

Kənan HACI

Ədəbiyyat qəzeti.- 2025.- 26 sentyabr, №35.- S.8.