“Ortaq dilin və elmi

təfəkkürün yüzillik yolu”

10 fevral 2026-cı ildə Azərbaycan Yazıçılar Birliyi-nin Natəvan klubunda professor, türkoloq Tofiq Məliklinin aparıcılığı ilə Bakı Birinci Türkoloji Qurultayının 100 illiyinə həsr olunmuş elmi-praktiki konfrans keçirilib.

Konfransı AYB-nin sədri, Xalq yazıçısı Anar açaraq 1926-cı ildə Bakıda keçirilmiş Birinci Türkoloji Qurultayın türk dünyasının elmi və mədəni tarixində mühüm mərhələ olduğunu vurğulayıb, bu mötəbər toplantının milli dil siyasətinin formalaşmasına və ortaq elmi düşüncənin inkişafına verdiyi töhfələrdən danışıb.

Türk Dünyası Araşdırmaları Mərkəzinin başqanı, professor Tofiq Məlikli qurultayın tarixi, ideya əsasları və nəticələri barədə geniş məruzə ilə çıxış edib, həmin dövrün elmi mühitini və qəbul olunmuş qərarların əhəmiyyətini təhlil edib.

Tədbirdə Xalq yazıçısı Sabir Rüstəmxanlı, millət vəkili Nizami Cəfərov, Slavyan Universitetinin professoru Nuridə Novruzova, tarixçi alim Minaxanım Təkləli, “Ədəbiyyat qəzeti”nin baş redaktoru Azər Turan çıxış edərək qurultayın tarixi missiyası, əlifba islahatları, dilimizin inkişaf mərhələləri və türkoloji elmin perspektivləri barədə fikirlərini bölüşüblər, maraqlı elmi və ictimai təkliflər səsləndiriblər.

Çıxışlarda xüsusi olaraq qeyd olunub ki, Bakı Birinci Türkoloji Qurultayı yalnız tarixi fakt deyil, həm də müasir dövrdə ortaq elmi-mədəni platformaların formalaşması üçün aktual örnəkdir.

Konfrans geniş fikir mübadiləsi şəraitində keçib və iştirakçılar tərəfindən böyük maraqla qarşılanıb.

Ədəbiyyat qəzeti.- 2026.- 14 fevral, №5.- S.11.