İmpressionizm

İşıq fırçasıyla çəkir Tanrı

Dünyanın bütün rənglərini.

Dünyanın bütün boyaları işıqdan keçir.

Bir dəfə çəkilir təbiətin hər anı.

Səmada buludları,

Küləyin qaldırdığı tozu,

Dənizin ləpələrini,

Çayın axarını -

Həyatın hər anını mümkün deyil təkrar çəkmək,

Hər vuranda ayrı duyğuyla döyünür ürək.

Qaytarmaq olmur ömürdən ötən hər bir anı,

Hər an ayrı baxışla seyr edirik dünyanı.

Bir işığın min çaları bir kölgədə gizlənir,

Fələklər də ulduz-ulduz, işıq-işıq düzlənir.

Daş da, torpaq da, dağ da, qaya da

Yağışda yuyunur,

Günəş işığına bürünüb yaşayır həyatı.

Tanrı işıqla hər gün təzələyir kainatı.

Bir eşqdə vəhdət tapır kainatda hər şey,

Yerin təki, göyün qatı.

İnsanın gözlərilə çəkilir

Allahın bir anlıq təəssüratı.

Abstraksizm

Allahın yaratdıqlarından uzaq,

Təbiətin ölçülərindən fərqli,

Sözlə çəkilən,

Eşqlə ölçülən,

Diqqətdən kənar görüntülər,

Düşüncələri yaran,

Çərçivəsinə sığmayan fikirlər,

Ölçüləri sındırıb keçən xətlər,

Həddini aşan sədlər,

Rənglənmiş, boyalanmış

Rənglərə, boyalara sığmayan

Xəyal dünyası.

Yaradıcı insan düşüncəsinin

Qeyri-adi həyat kompozisiyası.

Ölümə üsyan edən olum,

Batıya üsyan edən Doğu,

Tanrının dərkolunmaz sonsuzluğu.

Klassizm

Həyat gözəldir,

Gözəldir həyatın ağı, qarası,

Gözəldir insanın yaşamaq sevdası,

Yaşatmaq sevdası.

Başımız üstə bulud gözəldir,

Ayağımız altında daş.

Gözəldir nəsildən-nəsilə,

Tarixdən-tarixə ötürülən yaddaş.

İnsan da gözəldir, mələk də,

Torpaq da gözəldir, fələk də.

Ölüm də gözəldir, həyat da.

Həyatda

Qədrini bilək hər bir anın, saatın.

Dünyada ölüm olmasaydı,

Heç bir mənası olmazdı həyatın.

Dağ da gözəldir, düz də,

Gecə də gözəldir, gündüz də.

Necə də gözəldir eşq!

Necə də gözəldir məhəbbət!

Gözəldir bu yolda çəkdiyin əzab da,

Bu yolda etdiyin günah da.

Dünya gözəldir,

Gözəldir dünyanı gözəl yaradan Allah da.

Kubizm

Riyazi ölçülərlə qurulub cahan,

Riyazi ölçülərə sığışmır.

Həndəsi ölçülərlə yaranıb insan,

Həndəsi ölçülərə sığışmır.

İnsan məkana sığışmır,

İnsan zamana sığışmır.

İnsanın ölçülərində yaşayır neçə qat dünya,

Üçbucaq dünya,

Rom dünya,

Kvadrat dünya.

Eşq oxunda dolanan dünyamızın

Xət-xətdir paralelləri, meridianları,

Kəsir bir-birini əyrilər, düzlər,

Üçbucaq çiyinlər,

Üçbucaq üzlər.

Dördbucaq döş qəfəsində

azadlıq eşqiylə çırpınır ürək,

Çıxa bilmir dairədən,

Çıxa bilmir çərçivədən.

Onunçun çəkilmiş çevrədə

Dolanır zamanın başına.

Vücudu bənzəyir çoxüzlü meteroid daşına.

Gözü nə qədər açılsa da insanın

Yenə baxışı kor bucaqdır.

Kor bucaq kimi gəzir aranı, dağı,

Tanrı eşqindən gözləyir pənah,

Görmür yaxını, görmür uzağı.

Dünyada hər şeyi görür ancaq Allah,

Kürə şəklindədir Allahın baxış bucağı.

Yerdəyəm

Tur dağında, Sinada

Nur olduğum yerdəyəm.

Haqqın gözəlliyinə

Vurulduğum yerdəyəm.

Sudan, oddan süzülüb,

Təmiz addan süzülüb,

Daş inaddan süzülüb

Durulduğum yerdəyəm.

Yalan dünyada gəzib,

Yaxşı, yamanı sezib,

Qandan, qadadan bezib

Yorulduğum yerdəyəm.

Tanrının əli altda,

Zamanın dili altda,

Eşqimin külü altda

Qor olduğum yerdəyəm.

Sığmıram hər qanuna,

Yolam vüsal anına.

Göylərin mizanına

Qurulduğum yerdəyəm.

Özünü axtarır dünya

Nazdan düşmüş qarı kimi

Nazını axtarır dünya.

Kor ocağın qoru kimi

Közünü axtarır dünya.

Açıbdır fal kitabını,

Göyə tutub xitabını,

İtirib haqq-hesabını,

Düzünü axtarır dünya.

Ələyir qəm ələyini,

Çalır şeytan tütəyini.

Dostla halal çörəyini,

Duzunu axtarır dünya.

Sındırıb daş qəfəsini,

Ötmək istər nəğməsini.

Dara düşmüş haqq səsini,

Sözünü axtarır dünya.

Yolun azıb qaranlıqda

Dayanmayır bir anlıq da,

Hey gəzir bu viranlıqda,

Özünü axtarır dünya.

Xərcləyir könül varını,

Qıra bilmir qəm torunu.

Geyinibdir astarını,

Üzünü axtarır dünya.

Ağamir CAVAD

Ədəbiyyat qəzeti.- 2026.- 23 yanvar, №3.- S.19.