Şairlə görüş

Bakı Avrasiya Universitetində xalq şairi Nəriman Həsənzadə ilə görüş keçirilmişdir. Tədbiri universitetin rektoru, professor Akif Salahov açaraq ictimai fikrin formalaşmasında ədəbiyyatın rolundan, bu sahədə Nəriman Həsənzadənin xidmətlərindən söhbət açmış, onun poeziyasının gənclər tərəfindən xüsusi ilə sevildiyini diqqətə çatdırmışdır.

Şair İlyas Tapdıq qələm dostunun çoxcəhətli yaradıcılığından, dostlarına, yoldaşlarına, insanlara diqqət və qayğısından söhbət açmışdır. Şair Akşin Ağkəmərli Nəriman Həsənzadənin İranda, xüsusən də Cənubi Azərbaycanda sevilməsini diqqətə çatdırmış, şairlə uzun illərdən bəri dostluğundan danışmışdır. Gənc şair Ramin Qurbanın şairə həsr etdiyi şeri maraqla qarşılanmışdır. Digər çıxışçılar da - adı çəkilən universitetin müəllimi Zəminə Həsənova, Tələbə Gənclər Təşkilatının sədri Aqil Abdullayev, Həsənzadə lirikasının tədqiqatçısı, f.e.n. Güldanə Pənahqızı və b. xalq şairinin yaradıcılığının müxtəlif məziyyətlərindən, onun dramaturgiya sahəsindəki yaradıcılığından, "Nabat xalanın çörəyi" povestindən, danışmışlar.

Tədbirdə Nəriman Həsənzadənin şeirləri əsasında onun ömür yolunu əks etdirən ədəbi-bədii kompozisiya maraqla qarşılanmışdır. Tədbir iştirakçıları qarşısında dəmir kimi döyülüb, polad kimi əyilməyən, taleyin və zamanın zərbələrinə sinə gərən, danıla-danıla gerçək olan şairin bədii obrazı canlandırılmışdır. "Qaçaq Kərəm" poemasından fraqmentlər də tamaşaçılar tərəfindən maraqla qarşılanmışdır.

Görüş Nəriman Həsənzadənin universitetin təsisçisi Nazim Hüseynliyə, rektorluğuna, çıxışçılara və görüşə gələnlərə təşəkkürü və şeirlərindən nümunələr oxuması ilə sona çatmışdır.

A.Hacıbabayev

Ədəbiyyat qəzeti.-2009.-3 aprel.-S.2.