Uşaq dünyasının açılan qanadları

Düz on ildir ki, Azərbaycan Yazıçılar Birliyi Sumqayıt şəhər bölməsinin sədri Sabir Sarvanın ideya müəllifi olduğu “Qanadlandıq uçmağa” almanaxı nəşrləri təhsil şöbəsinin müdiri Vidadi Bağırovun, gənclər və idman baş idarəsinin rəisi Musa Həsənovun dəstəyi ilə işıq üzü görür. Almanaxda Sumqayıt məktəblilərinin şeir, hekayə və rəsmləri dərc olunub. Yubiley nəşrində isə 57 nəfər ümidverici balaca soydaşımızın rəngarəng poetik duyğuları və əlvan rəsmləri təqdim olunub. Kitaba şəhər təhsil şöbəsi metodik kabinetinin direktoru Sabir Məmmədov maraqlı ön söz yazıb.

Ön sözdə deyilir ki, “Qanadlandıq uçmağa” almanaxının sayəsində Sumqayıt UYYM-də xüsusi yaradıcılıq dərnəyi yaradılıb. Estetik Tərbiyə üzrə Respublika Tədris-Metodik Mərkəzinin əməkdaşları almanaxda dərc olunan 28 şeirə musiqi bəstələyiblər. Bu nəğmələr “Sumqayıt göyərçinləri” adlı kitabda nota köçürülüb. Almanaxın özünü təsdiqləməsində Füzuli Sabiroğlu, İradə Axundzadə və Murad Kərimovun zəhməti böyük olub.

Azərbaycan Yazıçılar Birliyinin Natəvan klubunda “Qanadlandıq uçmağa” almanaxının yeni sayında - yubiley almanaxının təqdimat mərasimində Birliyin sədri, xalq yazıçısı Anar, xalq şairi, AYB-nin birinci katibi Fikrət Qoca, Sumqayıt Şəhər İcra Hakimiyyəti başçısının müavini Ramiz Həsənov, şairlərdən Ofelya Babayeva, Qüdrət Muğanlı, filologiya elmləri doktoru Rafiq Yusifoğlu və başqaları çıxış edərək almanaxda təqdim olunan məktəbli-müəlliflərə təbriklərini və xoş arzularını çatdırdılar. Qeyd edildi ki, ola bilsin foyedə rəsmləri sərgilənən, kitabda şeirləri gedən və bu gün Yazıçılar Birliyinin Natəvan klubu kimi mötəbər bir məbədgahda çıxışları dinlənilib alqışlanan bu uşaqların heç də hamısı gələcəkdə hökmən tanınan şair və ya rəssam olmayacaq. Amma bir inam güclüdür ki, onların hər biri dünyaya poetik baxışı, obrazlı düşüncə tərzi, hər şeyə yaradıcı münasibəti ilə başqalarından mütləq seçiləcəklər. Başlıcası isə duyğulu, gözəl insan olacaqlar.

Çıxış edənlər yubiley almanaxının müəlliflərinə ilhamlı günlər arzuladı.

S.Əsgərli

Ədəbiyyat qəzeti.-2009.-24 aprel.-S.5.