Hikmət Əbdülhəlimov-70

Hörmətli Hikmət müəllim!

Sizi 70 yaşınızın tamam olması münasibətilə təbrik edirik.

Siz Bakı Ali Partiya məktəbini fərqlənmə diplomu ilə bitirərək partiya və komsomol işində məsul vəzifələrdə çalışmısınız. Şəki şəhər mədəniyyət şöbəsinə başçılıq etmisiniz. Şəki şəhər İcra Hakimiyyəti aparatında şöbə müdiri olmusunuz. Hazırda Bakı Telefon Rabitəsi İstehsalat Birliyində kadrlar şöbəsinin müdirisiniz. Rəsmi işdən başqa sizin böyük həvəslə məşğul olduğunuz bir iş də var. Siz 40 ildən artıq müddətdə xalqımızın mədəni sərvətini - folklor nümunələrini zərrə-zərrə toplamısınız. "Şəkinin gülüş çələngi", "Saa quzu kəsərəm", "Şəki lətifələri" kitabları sizin zəhmətinizlə ərsəyə gəlmişdir.

Azərbaycan MEA Nizami adına Ədəbiyyat İnstitutunun nəşr etdiyi "Azərbaycan folklor antologiyası" IV kitab, "Şəki folkloru" I cildinin tərtibçilərindən biri, "Azərbaycan folkloru antologiyası" VI-XIII kitab, "Şəki folkloru"nun II və III cildlərinin toplayanı, tərtibçisi, qeyd və şərhlərin müəllifisiniz. "Ünsiyyət körpüsü", "Qəhrəman ana, qayğıkeş qadın", "Əbədiyyətə qovuşan insan" kitabları da sizin tərtibatınızda və ön sözünüzlə işıq üzü görüb. "Ulduz" jurnalında, "Ədəbiyyat qəzeti"ndə, müxtəlif mətbuat orqanlarında topladığınız folklor nümunələri dərc olunmuşdur.

2003-cü ildə Azərbaycan Yazıçılar Birliyi Bədii Ədəbiyyatı Təbliğ Bürosunun "Yaddaş" mükafatına layiq görülmüsünüz.

Hörmətli Hikmət müəllim!

Sizi 70 illik yubileyiniz münasibətilə ürəkdən təbrik edir, sizə uzun ömür, cansağlığı, yeni yaradıcılıq uğurları arzulayırıq.

Azərbaycan Yazıçılar Birliyi

Ədəbiyyat qəzeti.-2009.-17 iyul.-S.6.