Rübailər
Mən ömür sürmürəm ad-san naminə,
Yazıram saf, təmiz vicdan naminə.
Bütün xeyirxahlar yaxşı iş görür
Özündən sonrakı insan naminə.
*
Güclü sel tələsir yarğandan ötrü,
Şimşək - meşədəki yanğından ötrü.
Neolit əsrində silah düzəldən
Yol salıb gələcək qırğından ötrü.
*
Özündə saxlayır neçə halı su -
Sirli, əsatirli, müəmmalı su.
Qar, yağış, buz, bulud, ildırım olur
Ərzin ən qəribə mineralı su.
*
Dənizin zirvədə izini gördüm,
Milyon qərinəlik "İrs"ini gördüm;
Bol mərcan qalıqlı qayalıqlarda
Sahil silkələyən "hirs"ini gördüm.
*
Dünəndən sabaha vaxt da yol gedir,
"Göydələn" evlərlə Bakı fəxr edir.
Fəqət binaların ən şöhrətlisi
Hələ də qocaman "Beşmərtəbədir"!
*
Nə qədər siyasət küləyi əsib,
Ya səmtin əksinə, ya da münasib…
…Bu adam balaca, bu adam azman,
Boy var - təfəkkürlə tərs mütənasib.
*
Buludun işinə heyranam, qağa!
Düşür ildırımtək dərəyə, dağa.
Göyə arxalanır - az ömürlü sel,
Əbədi çağlayan bulaq - torpağa.
*
Qara qız nə ərəb, nə zənci imiş,
Qədim məməlkətin öz gənci imiş.
Üzümə baxandan sonra anladım -
Metroda pul yığan dilənçi imiş.
*
Kürün sahilində uca bir ağac,
Qoca, çoxəsrlik ehram, pir ağac.
Yarpaq doğulsa da, yarpaq ölsə də,
Bir köklü-budaqlı nəsildir ağac.
*
Haram mənasında düşüb sözlüyə,
Əyrilik oxşayır bəzən düzlüyə.
Gözlük itirməyim xeyirli olub -
Çünki qayıtmışam eynəksizliyə…
*
Qaya daş dövründən yazılı qalıb,
Novruz əvvəlkitək Kosalı qalıb.
Tonqalın təzədən yandırılması
Son kibrit çöpündən asılı qalıb.
*
Göz verib sənə bu, mənə bu dünya.
Gərək gülüstana dönə bu dünya!
Qədim zamanlarda sərhədsiz imiş,
Sərhədsiz olacaq yenə bu dünya!
*
Ya Rəbb, kasıbı da doyunca güldür,
Düz Adam istəməz minnətli ləl, dürr.
Əzabsız gəlmişik mübhəm dünyaya,
Mümkünsə, Sən bizi əzabsız öldür!
*
Mizrab toxunduraq müqəddəs simə,
Bilinsin sözümüz aiddir kimə:
Nə qədər çalışıb cəhd eləsək də,
Ömürlük borcluyuq biz müəllimə.
*
Vətənin mərd qızı, oğlu qocalmaz,
Torpağa köküylə bağlı qocalmaz!
Nurlu sifətinə qırış qonsa da,
Müdrik adamların ağlı qocalmaz!
*
İlimdə təzə gün, ay gəzdirirəm,
Dilimdə xoş sözdən pay gəzdirirəm.
Qalın geyinməyim pərt edib qışı -
Canımda deyəsən yay gəzdirirəm.
*
Lövbəri nə yaman salıb bu qorxu,
Girib - qanımızda qalıb bu qorxu.
Bəlkə də kütləvi cəzadan qabaq
Bizim canımızda olub bu qorxu?!
*
Hər şeyin sonuna inanıram mən,
Qocaldın - tutasan gərək çəlikdən.
Məşhur filosofa o gün dedim ki,
Bezər ruh özü də əbədilikdən.
*
Desək də "ağa" "ağ", "qara"ya "qara",
Çox şeyin dəyəri bilinir sonra.
…Məhəccər, sadəcə tutalğac deyil,
Məhəccər, güc verir qocalanlara.
*
Əziz dost, çatışmır, de, nəyi Ərzin?
Var suyu, çörəyi… hər şeyi Ərzin.
İnsan əl çəkməsə bəd əməlindən
Vallah partlayacaq ürəyi Ərzin!
*
Bu durna görəsən niyə tək uçur?
Yayıb harayını göyə, tək uçur;
Bəlkə didərginlər, qaçqınlar kimi
Tənhalıq əzabı çəkərək uçur?
*
Məhəbbət səslənir eşqin tarında,
Həzin sədasıdır nakamların da.
Deyirlər bir dəfə vurulur adam,
Niyə "ilk məhəbbət" sözü var onda?
*
Üz, sevgi məhəbbət dənizində üz!
Üz, bu dağların da laləsindən üz!
Üzü saf məhəbbət işıqlandırır,
Üzüyü barmağa taxma könülsüz!
*
Tikanı gül kimi iyləyənlər var,
Bülbülə torağay söyləyənlər var.
Məhəmməd füzuli eşitsin: - İndi
Salamı mükafat eyləyənlər var.
*
Kişinin elə bil naxışı yoxdur,
Acı söz desə də, qarğışı yoxdur.
Çünki axşamadək çaxan şimşəyin
Səsi, şöləsi var, yağışı yoxdur!
*
Çalışır həmişə özündən ötrü,
O isə ya səndən, ya məndən ötrü.
Qırmızı geyimli süpürgəçilər
Yolu təmizləyir "ağ gün"dən ötrü.
*
Neyi bəyənməyən cənab ürəksiz
Az
qalıb
Ozan babaların ruhu narahat -
Sazı dilləndirək elektriksiz!
*
Halal sayılsa da haram dünyada,
Haqq üçün çalınan taram dünyada.
Nə zaman ürəyim, canım ağrıyır -
Mən onda bilirəm varam dünyada.
Oqtay Rza
Ədəbiyyat
qəzeti.-2009.-19 iyun.-S.4.