“Azərbaycan evi”ndə Bəxtiyar Vahabzadə yad edildi

Bu günlərdə ölkəmizin Böyük Britaniya və Şimali İrlandiya Birləşmiş Krallığındakı səfirliyindən göndərilən məlumatda xəbər verildiyi kimi, martın 1-də Londonda yerləşən "Azərbaycan evi"ndə unudulmaz şairimiz Bəxtiyar Vahabzadənin xatirə gecəsi keçirilmişdi. Səfirliyin dəstəyi ilə düzənlənən tədbir çərçivəsində səfirlik tərəfindən şairin seçilmiş əsərlərindən ibarət külliyyat Mərkəzin kitabxanasına hədiyyə edilmişdir.

Məclisi giriş sözü ilə Mədəniyyət mərkəzinin idarə heyətinin sədri Əli Təkin Atalar açmış və sadəcə Azərbaycan xalqının deyil, bütün türk dünyasının tanınmış şairi, ictimai xadim Bəxtiyar Vahabzadənin ədəbi fəaliyyətinin gənc nəsil tərəfindən öyrənilməsinin önəminə diqqət çəkmişdir.

Daha sonra çıxış edən səfir f.Qurbanov şairin keçdiyi həyat yoluna və zəngin ədəbi yaradıcılığına nəzər salmışdır. O, vurğulamışdır ki, şairin yaradıcılığı bütün ədəbi janrları əhatə etmiş və yaratdığı əsərlərdə qabartdığı obraz və əsas mövzular sadəcə məhdud bir zaman çərçivəsində qalmır, bütün dövrlər üçün aktuallıq kəsb edir. Şairin ictimai xadim kimi fəaliyyətinə də nəzər yetirən f.Qurbanov onun milli məfkurənin güclənməsində, ana dilimizin saflığının qorunmasında rolunu iştirakçıların nəzərinə çatdırmış və hələ sovet dövründə dilimizin işlənmə dairəsinin genişlənməsinə çalışdığını, 80-ci illərin sonlarında milli azadlıq hərəkatında özünə məxsus rol oynadığını vurğulamışdır. Səfir şairin ədəbi irsinin harada yaşamalarından asılı olmayaraq, yeni yetişən nəsil tərəfindən öyrənilməsinin əhəmiyyətini diqqətə çatdırmış və şairlə bağlı şəxsi xatirələrini iştirakçılarla bölüşmüşdür.

Daha sonra çıxış edən türkmən icmasının nümayəndəsi Annakuli Nurməmmədov, Londonda yaşayan həmyerlimiz şairə Nigar Həsənzadə, eləcə də digər icma nümayəndələri böyük şairlə bağlı şəxsi xatirələrini bölüşmüşlər. Çıxışlarda qeyd edilmişdir ki, şair sadəcə öz ölkəsində deyil, onun hüdudlarından kənarda və xüsusən türk ölkələrində hörmətlə anılır və onun əsərləri sevilə-sevilə oxunur. Onun əsərlərinin aparıcı xəttini ana dilimizin saflığının qorunmasına çağırış, milli adət və ənənələrə sədaqət, fərdi və milli azadlığın əldə edilməsi məqsədi təşkil edir.

Şairin həm də ictimai xadim kimi fəaliyyəti yüksək qiymətləndirilmiş və əsərlərinin xüsusilə yetişməkdə olan gənc nəsil arasında geniş öyrənilməsi və təbliğinin əhəmiyyətinə toxunulmuşdur.

Tədbir zamanı şairin yaratdığı ölməz əsərlərdən misralar səsləndirilmiş və geniş ekranda şairin həyat və fəaliyyətini, müxtəlif müsahibələrini əks etdirən kadrlar göstərilmişdir.

Ədəbiyyat qəzeti.-2009.-20 mart.-S.7.