Yad et məni, şairanə yad et…"

Martın 19-da AYB-nin sədri, xalq yazıçısı Anar, Birliyin katibləri Rəşad Məcid, Nazim İbrahimov, xalq şairi, millət vəkili Vaqif Səmədoğlu başda olmaqla bir qrup yazıçı və şair fəxri xiyabana gələrək ölməz söz ustalarımızın ruhunu yad edib, qəbirləri üstünə gül-çiçək qoydular. Ömrünü ədəbiyyatımızın, mədəniyyətimizin inkişafı yolunda şam kimi əritmiş, dünyadan köçəndə də "Biz dünyadan gedər olduq, qalanlara salam olsun", "Biz gəldi-gedərik, sən yaşa dünya", "Yarat, sən köçəndə ellər söyləsin - dünyadan nə gözəl bir insan gedir", "Mən qorxardım ölümdən - dünyaya məndən sonra gələnlər olmasaydı", "Mən öləndə ağlamayın…" məfkurəsi ilə köçən ustad sənətkarlarımızın ölməz ruhu, unudulmaz xatirələri önündə əyilən başlar "Bizdə şeir də var, sənət də vardır, şairə, sənətə hörmət də vardır" təskinliyini, ədəbi haqlara, varisliyə hörmət hissini ifadə edirdi.

"Bahar nə xoş gəlir, ruha dad verir" duyğusuyla yazıb-yaradanların mənəvi ömrü də bahar kimi təzə-tər, təravətli, yaşarı olur. Ziyarət mərasimində bu əbədiyaşarlığa dərin hörmət hissi üst qatdaydı.

Sərvaz

Ədəbiyyat qəzeti.-2009.-20 mart.-S.7.