Qızıl kəlmə" ədəbi mükafatı təqdim edildi

Mədəniyyət və Turizm Nazirliyinin ümummilli lider Heydər Əliyevin anadan olmasının 86-cı ildönümünə həsr edilmiş tədbirlər planı çərçivəsində təsis etdiyi "Qızıl kəlmə" ədəbi mükafatının təqdimetmə mərasimi aprelin 6-da Rəşid Behbudov adına Mahnı Teatrında keçirildi.

Ötən ilin iyulundan elan olunmuş mükafata 4 nominasiya üzrə 38 adda əsər təqdim edilib. Onlardan 12-i nəsr, 12-i poeziya, 11-i publisistika və ədəbi tənqid, 3-ü isə tərcümə əsəri olub. Müsabiqənin nəticəsində 7 müəllif mükafata layiq görülüb, 2 müəllifə isə "Şans ödülü" həvəsləndirici mükafatı verilib.

Mükafat komissiyasının sədri, mədəniyyət və turizm naziri Əbülfəs Qarayev təqdimetmə mərasimində çıxış edərək bu təşəbbüsün real olaraq Azərbaycanda ədəbi prosesin dəyərləndirilməsinə müəyyən bir təkan verdiyini qeyd etdi: "Onu da qeyd etmək lazımdır ki, cənab Prezident İlham Əliyev mədəniyyətimizə göstərdiyi diqqət və qayğı ilə ulu öndər Heydər Əliyevin siyasi kursunu uğurla davam etdirir. Dövlət başçısının mədəniyyətin inkişafı yönündə imzaladığı sərəncamlar, verdiyi fərmanlar bu sahənin daha da çiçəklənməsinə xidmət edir. O da danılmazdır ki, ulu öndər Heydər Əliyevin respublikaya rəhbərlik etdiyi dövrdə Azərbaycanın müasir, çağdaş, klassik ədəbiyyatı ciddi şəkildə formalaşmağa başladı. Bu gün biz bu siyasətin məntiqi davamı olaraq çalışırıq ki, müstəqil Azərbaycanımızın ədəbi prosesinin inkişafını təmin edək, əsasən də oxucuların maraqlarını qoruyaq. Bu baxımdan da nazirlik uğurlu tərcümələri, yeni nəşrləri və layihələri, yaradıcı axtarışları dəstəkləyir".

Sonra nazir yeni “Qızıl kəlmə” mükafatının bu ilk təqdimatında komissiya üzvlərinin çox böyük iş gördüklərini, obyektivlik nümayiş etdirdiklərini və yalnız əksər səs çoxluğu ilə qalibləri müəyyənləşdirdiklərini qeyd etdi.

Tədbirdə Milli Məclisin üzvü, filologiya elmləri doktoru, professor Nizami Cəfərov da mükafat komissiyasının üzvləri adından çıxış etdi. O, ölkədə aparılan əzəmətli quruculuq işləri ilə yanaşı, dövlət başçısı İlham Əliyevin mədəniyyət, ədəbiyyat və incəsənət adamlarına xüsusi diqqət ayırdığını ulu öndər Heydər Əliyev siyasətinin davamı və təntənəsi kimi qiymətləndirdi. N.Cəfərov bugünkü “Qızıl kəlmə” ədəbi mükafatının təqdimat mərasiminin də məhz bu siyasi xəttə xidmət edən ədəbi hadisə kimi tarixə düşdüyünü vurğuladı.

Sonra mükafatların təqdimat mərasimi başladı. Publisistika sahəsində “Qızıl kəlmə” mükafatının ilk qalibi “Görkəmli adamların həyatı” seriyasından olan “Heydər Əliyev” əsərinə görə müəllif, Milli Məclisin üzvü, yazıçı-dramaturq Hüseynbala Mirələmov oldu. Mükafatı qalibə komissiyanın sədri, mədəniyyət və turizm naziri Əbülfəs Qarayev təqdim etdi.

Məhz bu əsərinə görə aldığı “Qızıl kəlmə” mükafatının onun həyatında çox əlamətdar bir hadisə olduğunu vurğulayan yazıçı Hüseynbala Mirələmov, ümummilli lider Heydər Əliyevin onun taleyində həmişə böyük rolu olduğunu tədbir iştirakçılarının diqqətinə çatdırdı. “Mən bu mükafatı da ulu öndər Heydər Əliyevdən yazdığım əsərə görə aldığım üçün böyük qürur hissi keçirirəm” – deyə H.Mirələmov çıxışını tamamladı.

Nəsr sahəsində yazıçı, Milli Məclisin üzvü, Aqil Abbasa “Dolu” romanına, yazıçı- dramaturq Elçin Hüseynbəyliyə “On üçüncü həvari — Don Juan” romanına, poeziya sahəsində şair Zakir Fəxriyə “Qalmaz belə, qalmaz dünya” əsərinə, Taleh Həmidə dördcildliyinin iki cildinə, bədii tərcümə sahəsində Saday Budaqlıya M.Bulqakovun “Master və Marqarita” romanına, Məmməd Oruca G.Lətifxanın “Azər və Aida” romanının tərcüməsinə görə “Qızıl kəlmə” mükafatı təqdim olundu.

Yunis Oğuz “Nadir şah”, Səlim Babullaoğlu isə “İlyas Göçmənin şəkil dəftəri” əsərlərinə görə həvəsləndirici “Şans ödülü” mükafatına layiq görüldülər.

Mərasim tanınmış müğənnilərin çıxışı ilə başa çatdı.

Sərvaz

Ədəbiyyat qəzeti.-2009.-8 may.-S.7.