“Bayatı yağmuru”

Bu günlərdə AYB-nin Natəvan klubunda Cabir Umudun "Bayatı yağmuru" adlı kitabının təqdimat mərasimi keçirildi.

Mərasimi giriş sözü ilə açan və idarə edən şair Məmməd Aslan öncə bizim folklorumuzda, xalq ədəbiyyatımızda bayatının tutduğu siqlətli, dəyərli yerdən konkret nümunələrlə danışdı, sonra redaktoru və ön söz müəllifi olduğu "Bayatı yağmuru" kitabının özəlliklərinə toxundu.

Mərasimdə iştirak edən folklorşünas alim, professor Qəzənfər Paşayev tədqiq etdiyi, toplayıb araya-ərsəyə gətirdiyi “İraq-Kərkük bayatıları”nın timsalında Azərbaycan bayatılarına elmi münasibətini bildirib bu fonda C.Umudun yeni kitabını dəyərləndirdi. Qeyd etdi ki, təqdim olunan kitabda dilimizin saflığı, düşüncəmizin aydınlığı var.

Yazıçı-publisist Flora Xəlilzadə dil baxımından mükəmməlliyini vurğuladı, kitabdakı bayatılardan misallar gətirdi.

Şairlərdən Adil Cəmil, Məmməd İlqar, Xatirə, Yusif Hüseyn, İdris Verdiyev, jurnalist Şəfəq Sultan, "Azərsu SC"nin məsul işçisi Vəliyəddin İsmayılov və b. çıxış edərək təqdim olunan bayatılar kitabına təhlili münasibətlərini bildirdilər.

Sonda Cabir Umud iştirakçılara, xüsusən də bu kitabın işıq üzü görməsinə qayğısını əsirgəməyən Məmməd Aslana - orta məktəb müəlliminə dərin təşəkkürünü bildirdi.

Ədəbiyyat qəzeti.-2009.-20 noyabr.-S.6.