Rəhmətlə xatırlananlar

1921-ci ildə Bakıda kimsəsiz uşaqlar həddindən ziyadə çox idi. 1918-ci ildə erməni-müsəlman qırğını, sonra isə qırmızı ordunun törətdiyi qətliamlar, talan həftəsi xeyli uşağı yetim, kimsəsiz qoymuşdu. Digər tərəfdən Rusiyada və digər ölkələrdə baş verən aclıq nəticəsində baxımsız qalan xeyli uşaq müxtəlif yollarla axışıb Azərbaycana gəlmişdi. Belə bir vaxtda üç nəfər entuziast N.Yüzbaşova, S.Rabkina, A.Troyanovskaya tərəfindən kimsəsiz uşaqlar üçün kitabxana yaratdılar. Onlar 1922-ci ildə, məşhur yazıçı V.Q.Korolenkonun vəfatından sonra kitabxanaya onun adını verirlər.

Kitabxana dövlətin də diqqətini cəlb edir. Hökumətin fərmanı ilə 1928-ci ildə fəhlə-gənclər kitabxanası adıyla yenidən qurularaq Azərbaycanın ilk gənclər kitabxanası kimi fəaliyyətini davam etdirir.

O vaxtdan indiyə kimi bu mədəniyyət ocağı işini dayandırmayıb. Yaxşı haldır ki, bir çox mədəni-maarif müəssisələri dağıldığı zamanda bu kitabxana öz varlığını qoruyub saxlaya bilmişdir. Bu günlər isə V.A.Korolenko adına Mərkəzi şəhər Kitabxanasının işçiləri hökumət fərmanı ilə təsdiq olunmalarının 80 illik yubileyini qeyd etmişlər.

Yubiley tədbirini kitabxananın direktoru Rəna Biləndərli açaraq bu ocağın tarixi, müasir vəziyyəti haqqında məlumat vermişdir. Yığıncaqda respublikanın əməkdar jurnalisti, Milli Məclisin deputatı yazıçı Elmira Axundova, C.Cabbarlı adına Respublika Gənclər Kitabxanasının müdiri Tahir Sadıqov, Təhsil Nazirliyinin şöbə müdiri Ağabala İbrahimov, kitabxananın oxucuları olan yazıçılar - A.Xakimov, A.İsmayıloğlu, Bakı Slavyan Universitetinin jurnalistika, və Azərbaycan ədəbiyyatı kafedrasının müdir müavini Fərrux Məmmədov, Bakı şəhər Mədəniyyət və Turizm İdarəsinin əməkdaşı Səbinə Məmmədova və başqaları bu mədəni-maarif ocağının fəaliyyətindən, əməkdaşların oxuculara qayğısından söhbət açmış, müasir vəziyyətdə bu səpkili müəssisələrin qarşısında duran məsələləri diqqətə çatdırmışlar. Çıxışçılar bildirmişlər ki, müstəqillik qazandığımız zamanda kitabxanalar xalqımızın elmi potensialının artırılması, milli-mənəvi dəyərlərin qorunması, gənc nəslin tərbiyəsi sahəsində böyük iş görə bilərlər.

Eyni zamanda, təəssüf hissi ilə qeyd olunmuşdur ki, müstəqillik qazandığımız dövrdə xeyli kitabxana fəaliyyətini dayandırmış, onların binalarının müəyyən hissəsi mənimsənilmiş, yeni salınmış qəsəbələrdə digər mədəni-maarif ocaqları kimi kitabxanaların tikintisi də "unudulmuşdur".

Yığıncaqda gözəl əməl sahibləri olan kitabxananın qurucuları Rabkina, Troyanavskaya, Yüzbaşova da rəhmət hissi ilə xatırlanmışlar.

A.Xiləli

Ədəbiyyat qəzeti.-2009.-23 yanvar.-S.5.