Birgə əməkdaşlıq çərçivəsində keçirilən tədbir

Bu günlərdə Azərbaycan Respublikası Prezidentinin İşlər İdarəsinin Prezident Kitabxanasında AMEA A.Bakıxanov adına Tarix İnstitutunun son illərdə Azərbaycan tarixinə dair nəşr etdirdiyi kitabların sərgisi və elektron versiyaları nümayiş etdirildi. Elektron resursların hazırlanması zamanı xalqımız üçün ağrılı mövzular olan Xocalı soyqırımına, 20 Yanvar faciəsinə, azərbaycanlıların soyqırımı və deportasiyasına, Ermənistan-Azərbaycan, Dağlıq Qarabağ münaqişəsinə dair fundamental kitabların seçilməsinə üstünlük verilmişdi. Ümumiyyətlə, AMEA Tarix İnstitutu əməkdaşlarının əməyinin məhsulu olan 100 addan artıq kitab və onların elektron versiyası internet məkanında istifadəçilərə təqdim edilir.

Sərgidə iştirak edən Azərbaycan Respublikası Prezidentinin İşlər İdarəsinin Prezident Kitabxanasının direktoru Mayıl Əhmədov çıxışında bugünkü tədbirdən məmnun olduğunu bildirərək qeyd etdi ki, informasiya cəmiyyətinin formalaşdırılması yeni texnologiyalar əsasında elektron resursların yaradılmasını, müxtəlif istiqamətlər üzrə nəşrlərin elektron versiyalarının hazırlanıb virtual məkanda yerləşdirilməsini tələb edir. Prezident kitabxanası istər ölkəmizdə, istərsə də ölkəmizdən kənarda nəşr olunan və Azərbaycan oxucusu üçün ciddi əhəmiyyət kəsb edən kitabların əldə edilərək kitabxananın fonduna daxil edilməsi üçün zəruri işlər görür. Eyni zamanda, Prezident kitabxanasının əməkdaşları Azərbaycan tarixinə, mədəniyyətinə, iqtisadiyyatına və digər mühüm sahələrə aid elmi əhəmiyyət daşıyan və aktuallıq kəsb edən müxtəlif dillərdə kitabların elektron versiyasını hazırlayaraq, www.preslib.az saytında yerləşdirirlər.

Kitabxananın fondu son dövrdə Tarix İnstitutunun qrifı və onun əməkdaşlarının müəllifliyi ilə nəşr olunmuş kitablarla mütəmadi olaraq zənginləşir. Təqdirəlayiq haldır ki, həmin kitabların bəzilərinin elektron versiyalarını məhz institutun əməkdaşları özləri kitabxanaya təqdim edirlər.

Sonda natiq qeyd etdi ki, Tarix İnstitutu ilə əməkdaşlıq qarşılıqlı faydalıdır. Həm kitabxananın fondu zənginləşir, həm də bu əsərlərin virtual məkanda təbliği sürətlənir və Azərbaycanın tarixi həqiqətləri qlobal informasiya cəmiyyətinə inteqrasiya olunur.

Sərgidə iştirak edən AMEA A.Bakıxanov adına Tarix İnstitutunun direktoru, tarix elmləri doktoru, professor Yaqub Mahmudov da öz növbəsində bu işdə əməyi olan hər bir kəsə minnətdarlığını bildirərək, belə işlərin Azərbaycan tarixi üçün böyük əhəmiyyət daşıdığını qeyd etdi. İnternet vasitəsilə bütün dünyanın Azərbaycanın tarixi həqiqətləri ilə tanış olacağını vurğuladı.

Samirə KƏRİMOVA

Elm.- 2010.- 30 iyun.- S.3.