Geologiya İnstitutu Avstriya şirkətləri ilə yeni əlaqələr qurur

Azərbaycan Milli Elmlər Akademiyası Geologiya İnstitutunun alimləri Avstriyanın HOT Mühəndisi Tədqiqatlar və Təkmilləşdirmə Şirkətində olmuş, neft-qaz, geofizika və qazma sahəsində peşəkarlığın artırılması istiqamətində əməkdaşlıq imkanları müzakirə edilmişdir.

İnstitutun elmi işlər üzrə direktor müavini, akademik İbrahim Quliyev, AMEA-nın müxbir üzvləri Hətəm Quliyev və Qalib Əfəndiyev təmsil etdikləri elmi müəssisənin qeyd olunan sahələrdəki tədqiqatları və nailiyyətləri barədə məlumat vermişlər.

Şirkətin prezidenti Dyetard Kratzer öz növbəsində rəhbərlik etdiyi qurumun fəaliyyəti barədə geniş məlumat vermiş və Geologiya İnstitutu ilə əməkdaşlıq etmək niyyətini bildirmişdir.

Azərbaycanlı geoloqların Avstriyada əməkdaşlıq niyyətli növbəti görüşü OMV Tədqiqatlar və İstehsalat Şirkətində olmuşdur. Burada da neft-qaz, geofizika və qazma sahələrindəki tədqiqatlar və təcrübələr barədə qarşılıqlı məlumatlar verilmişdir. OMV-un alimləri Azərbaycanda tədqiqatlara başlamağın böyük həvəsində olduğunu bildirmişlər. Hər iki neft şirkətinin əməkdaşlıq niyyəti ilə bu ilin sonunda Geologiya İnstitutuna səfəri planlaşdırılmışdır.

Elm.- 2010.- 21 sentyabr.- S.6.