"LAL TƏKAMÜL"ÜN ƏKS-SƏDASI

Karib dənizinin dibində, Meksikanın kurort şəhəri olan Kankun yaxınlığında dünyanın ən böyük sualtı bədii muzeyi - Subaquatic Sculpture Museum yaradılmışdır. 2010-cu ilin dekabrında açılışı olan sualtı muzeyin 2-10 metr dərinliklərdə yerləşən ekspozisiya meydançalarında təbii ölçülərdə yaradılmış 400 heykəl yer almışdır.

"Lal təkamül" adlı bu layihəni reallaşdırmaq üçün müəllifə-heykəltəraş Ceyson Teylora bir il yarım vaxt, üstəlik 120 ton sement, 400 kq silikon, 3.8 min şüşə lif tələb olunmuşdur. Xoşbəxtlikdən dayvinq üzrə təlimatçılıq bacarığı olan Teylor su altında 120 saat vaxt keçirməli olub.

Teylor tərəfindən hazırlanmış xüsusi texnologiyanın köməyilə nəinki tam ölçülü fiqurlar yaratmaq, eyni zamanda, onları quraşdırmaq da mümkün olmuşdur. Hazır heykəllər okeanın dərinliyinə endirilmiş və okeandaxili cərəyanlar onları tərpətməsin deyə, ikitonluq səth üzərində quraşdırılmışdır. Muzey bir-birindən fərqli yerlərdə (Punta Nizus, Punta Kankun və Muxeres adası yaxınlığında) yaradılmış üç ekspozisiyadan ibarətdir.

Adi muzeylərdə eksponatların toxunulmazlığını təmin etmək üçün bütün təhlükəsizlik tədbirlərinin görüldüyü halda, burada hər şey əksinədir! "Lal təkamül" daim dəyişəcək. Britaniyalı heykəltəraş bu işdə ona mərcanların və dəniz sakinlərinin "kömək" edəcəklərinə əminliyini bildirmişdir.

Bəşəriyyətin ətraf mühitlə olan mürəkkəb münasibətlərini göstərmək, mərcan rəflərin zərif ekosistemlərinə insanların diqqətini yönəltmək layihənin ideyasını təşkil edir. Sualtı muzeyin heykəlləri isə mərcanların bitəcəyi və dəniz sakinlərinin sığınacaqları özünəməxsus süni riflər olacaqdır. Planetimizin sualtı dünyasının gözəlliyindən zövq almaq və riflərin təkamülünü qiymətləndirmək üçün dayverlər, snorkelinq pərəstişkarları şüşə qayıqlarda bir-birindən kifayət qədər məsafədə yerləşmiş heykəllərə tamaşa edə biləcəklər. Eksponatların "İtirilmiş ümidlərin kolleksiyaçısı", "Od içində insan", "Ümidlərin bağbanı" və s. kimi adları da onların yüksək bədii dəyərindən xəbər verir.

Hazırladı: Ülviyyə MƏMMƏDOVA

Elm.- 2012.- 30 oktyabr.- S.16.