Opera və Balet Teatrının Simfonik Orkestri Almanları heyran etdi

Azərbaycan Dövlət Akademik Opera və Balet Teatrı Simfonik Orkestrinin artistləri Almaniyada avqustun 5-dən 9-na kimi davam edən Münhen Opera Sənəti Festivalından dönüblər. Bu il həmin festivalda dünyanın 36 ölkəsindən -Avropa, ABŞ, Latın Amerikası, Yaponiya, Cənubi Koreya, Çin və b. ölkələrdən dirijor, rejissor və vokal sənəti ulduzları iştirak ediblər.

Opera və Balet Teatrının mətbuat xidmətindən verilən məlumata görə, festival çərçivəsində bütün konsert və tamaşalar anşlaqla keçib. Orkestr avqustun 8-də festivalın Qrand-Final konsertində iştirak edib. Konsertdə dünya şöhrətli məşhur vokalçılar Qustavo Kazanova (İspaniya), Mariya Joze Rodriges (Meksika), Uvone Fontane (Böyük Britaniya) və b. çıxış ediblər. Konsertin proqramına isə Qərbi Avropanın məşhur bəstəkarları J.Bize, R.Leonkovallo, D.Donisetti, C.Puççini, Berlioz, Vaqner, C.Verdi, C.Rossini, C.Veber, Offenbax və b. populyar əsərləri daxil edilib. Qala-konserti Münhen Opera Sənəti Festivalının baş dirijoru və bədii rəhbəri Korneliya fon Kerssenbrofk idarə edib.

Konsertin sonunda simfonik orkestr Q.Qarayevin "Yeddi gözəl" baletindən vals ifa edərkən zaldakı bütün tamaşaçılar ayağa qalxaraq musiqiçilərimizi alqışlayıblar.

Qala-konsertdə iştirak edən "Volkswagen" şirkətinin prezidenti Martin Vinterkorn həyat yoldaşı ilə birlikdə musiqiçilərimizə yaxınlaşaraq onları təbrik edib: "Biz bügünkü konsertdən böyük zövq aldıq. Orkestr bu gün yüksək professional səviyyədə çıxış etdi. Dünyanın ən məşhur bəstəkarlarının mürəkkəb əsərləri orkestrin ifasında böyük ustalıqla ifa olundu. Bu çıxış göstərdi ki, Azərbaycan təkcə öz nefti ilə deyil, həm də yüksək akademik sənəti və professionallardan ibarət simfonik orkestri ilə fəxr edə bilər. Bugünkü musiqi bayramını mən və həyat yoldaşım hər zaman xatırlayacağıq".

Festivalın gedişini işıqlandıran "Münxener Merkur", "Oberbayerişes Folksblat", "Züddoyçe Çaytunq" qəzetlərində Azərbaycan Dövlət Akademik Opera və Balet Teatrının Simfonik Orkestrinin ifaçılıq səviyyəsi haqqında yüksək fikirlər qeyd olunub.

Qala-konsertdən sonra Münhen Opera Festivalının direktoru, tanınmış alman biznesmeni və ictimai xadimi Lüdviq Bauman Azərbaycan Dövlət Akademik Opera və Balet Teatrının Simfonik Orkestri barədə xoş sözlər söyləyib: "Azərbaycanlı musiqiçilərin istedadı, onların fədakarlığı və ilhamla çıxış etmələri məni heyran edir. Orkestrdə hökm sürən nizam-intizam və yüksək təşkilatçılığı xüsusilə qeyd etmək istəyirəm. Simfonik orkestrin qala-konsertdəki çıxışı fantastik oldu. Mən və Korneliya Kerssenbrofk bir neçə dəfə Azərbaycanda olmuşuq. Bu ölkəni, onun qonaqpərvər və istiqanlı xalqını çox sevirik. Fəxr edirik ki, Azərbaycanla dostluq edirik. Nə qədər ki biz varıq, hər il Azərbaycan Opera və Balet Teatrının möhtəşəm simfonik orkestrini bu festivala dəvət etməkdən böyük şərəf duyacağıq. Bizim böyük dostumuz, Azərbaycan Opera və Balet Teatrının direktoru Akif Məlikova xüsusi salam və təşəkkürlərimi yetirmək istərdim, çünki məhz onun vasitəsilə biz sizin gözəl ölkəniz və möhtəşəm musiqi sənətinizlə tanış olmuşuq".

AYXAN

Ekspress.- 2010.- 11 avqust.- S. 10.